Qashqadaryo viloyatida o‘smir qiz otasi unga va singlisiga onasining o‘limidan so‘ng shilqimliklar qilayotganini aytib, video e’lon qildi. Holat bolalar ombudsmani tomonidan nazoratga olingani ma’lum qilindi.
Aytilishicha, bolalar ombudsmani kotibiyatiga ijtimoiy tarmoqlar orqali o‘smir qiz o‘z otasi tomonidan turli shakldagi zo‘ravonlikka uchragani haqida gapirayotgani aks etgan video kelib tushgan. Holat bolalar ombudsmani tomonidan nazoratga olindi.
Qizning murojaatiga ko‘ra, 2008-yilda tug‘ilgan M.SH. (qiz bola) va 2010-yilda tug‘ilgan N.SH. (qiz bola)larning onasi 2018-yilda vafot etgan. Qiz onasining o‘limidan so‘ng, otasi N.R. unga nisbatan turli uyatsiz-buzuq harakatlar, shilqimliklar qilib, bir necha yil davomida muttasil kaltaklab ham kelgani, turli haqoratlar bilan uning sha’ni, qadr-qimmatini poymol qilganini bildirgan.
Qizlar bir necha marotaba uydan chiqib ketgani sababli buvisi nevaralari bedarak yo‘qolgani haqida bergan arizasiga ko‘ra hamda voyaga yetmagan qizlarning otasi harakatlariga huquqiy baho berish uchun mazkur holat yuzasidan Qarshi shahar prokuraturasi tergovga qadar tekshiruv harakatlari olib bormoqda.
Hozirda voyaga yetmagan qizlar ijtimoiy-huquqiy jihatdan xavfli ahvolda bo‘lgani sababli Qashqadaryo viloyati IIB huzuridagi Voyaga yetmaganlarga ijtimoiy-huquqiy yordam ko‘rsatish markaziga joylashtirilgan va ularga zaruriy ko‘mak ko‘rsatilmoqda.
Izoh (0)