Toshkent viloyatida yuk kuzatuv hujjatlarida ko‘rsatilmagan 220 million so‘mlik tovar fosh bo‘ldi, deb xabar beradi viloyat bojxona boshqarmasi matbuot xizmati.
Ma’lum qilinishicha, xorijdan “Yallama” chegara bojxona posti orqali O‘zbekistonda faoliyat olib borayotgan masʼuliyati cheklangan jamiyatning nomiga olib kelingan tovarlar bilan yuklangan MAN TGX 18.440 rusumli avtotransport vositasi belgilangan tartibda bojxona ko‘rigidan o‘tkazilgan.
Natijada, yuk kuzatuv hujjatlarida ko‘rsatilmagan, qiymati 220 million so‘m bo‘lgan 440 dona har biri 4 litrdan bo‘lgan High Ultra 10W-40 motor moyi borligi aniqlangan.
Jismoniy va yuridik shaxslar amaldagi tartiblarga muvofiq, O‘zbekiston bojxona chegarasini kesib o‘tishda o‘zlari bilan olib ketayotgan tovar va moddiy boyliklarni belgilangan meʼyorlar asosida ishonchli va to‘g‘ri deklaratsiyalanishi uchun qonun hujjatlariga muvofiq javobgar.
Hozirda holat yuzasidan dastlabki surishtiruv harakatlari davom etmoqda.
Avvalroq “Yallama” postida 830 mln so‘mlik LED chiroqlarning mamlakatga noqonuniy olib kirilishiga chek qo‘yilgani to‘g‘risida xabar berilgandi.
Izoh (0)