2021-yilning 17-avgust sanasida Qashqadaryo viloyatining Qarshi shahrida ushu-sanda bo‘yicha jahon chempioni, MMA jangchisi Elbek Rahimov o‘ldirib ketildi.
Yigit avvaliga rosa do‘pposlangan. So‘ngra pichoqlanib, yarimjon holatda mashinaga solib olib ketilgan. Marhumning jasadi Chiroqchi tumanining Yettitom qishlog‘idan topilgan. Eng qizig‘i, bu qotillar orasida hali 16 yoshga to‘lmagan o‘smir yigit ham bor edi.
“Nadomat” loyihasining navbatdagi sonida u nega qotillikka sherik bo‘lgani haqida so‘zlab berdi. O‘ylaymizki, mahkumning afsus-nadomatlari “ko‘cha hayoti”ga qiziqayotgan va o‘ylamay qadam tashlayotgan insonlar uchun saboq bo‘ladi.
Mahkum — 18 yoshda, u 2023-yilning 15-aprel sanasida Zangiota tumanidagi 24-sonli tarbiya koloniyasiga keltirilgan. Unga qadar Qashqadaryodagi 5, Buxorodagi 4 va Toshkentdagi 1-sonli hibsxonalarda saqlangan.
U O‘zbekiston Respublikasi Jinoyat kodeksining 97-modda 2-qismi, 137-modda 3-qismi va 277-moddalari bilan 9 yil-u bir oyga ozodlikdan mahrum etilgan.
— Bolalikdan sportning futbol turiga qiziqqanman. Bir muddat Qarshidagi “Nasaf” klubiga ham qatnaganman. Undan keyin qo‘l jangi bilan shug‘ullandim. Bir nechta musobaqalarda ham ishtirok etgandim. Sportdan tashqari, musiqaga bo‘lgan qiziqishim ham yuqori edi. To‘rtinchi sinfda o‘qiyotganimda onam gitara to‘garagiga olib borgan. Besh yil davomida musiqa maktabida ham tahsil olganman. Keyin basketbol bilan shug‘ullandim. O‘sha paytda ozgina “ko‘cha hayoti”ga qiziqib qoldim va yangi tanishlar orttirdim, — deydi mahkum.
“Sen shunday inson bilan do‘st bo‘lginki, unda aql, xushfeʼllik va solihlik bo‘lsin. Agar do‘st deb bilgan kishingda bu xislatlarni uchratmasang, undan qoch. U seni zulmatga g‘arq etadi”. Qahramonimiz boshqalarga nisbatan bu jumlalarning mohiyatini yaxshiroq anglaydi. Chunki u do‘st deb bilgan insoni sabab bugun panjara ortida.
— 2021-yilning iyul oyida “Viktoriya” degan qahvaxonada yaqin do‘stim Yahyo o‘tirgan vaqtida sportchi Elbek Rahimov oshnalari bilan kirib kelgan. Arzimas sabab bilan do‘stimni urishgan, Nishon tumanidagi chetroq yerga olib borib tahqirlashgan. Bir necha kundan keyin ahvolini ko‘rib “Nima bo‘ldi?”, desam avvaliga aytmadi.
17-avgust kuni doimgidek tong saharda yugurishga chiqdim. Do‘stim bozorda ishlardi, “Yangi mollar kelgandi, ko‘tarishga yordam berolasanmi?” deb chaqirdi. Borsam yoshi kattaroq tanishimiz ham o‘sha yerda ekan. “U bilan gaplashib kelaylik”, dedi. Avvaliga hech qayerdan mashina topolmadik, chunki biz 8 kishi edik. Oxiri bitta Gentra avtomobilini topib, Elbek Rahimov turgan “dom”ning yoniga bordik. U 9:00larga yaqin chiqib keldi. Avval mashinasini o‘t oldirib, keyin bizning yonimizga keldi. Yoshi kattaroq tanishmiz “Elbek, kel gaplashib olaylik” deganimizda kiyimining oldini yechib, pnevmatik quroldan o‘q uzdi. Biz uni quvlab ketdik, u panjaradan o‘tayotganida yiqilib tushdi. Biz uni urayotgan vaqtimizda bitta sherigimiz oyog‘iga pichoq sanchib oldi. Shovqindan atrofga odamlar yig‘ila boshladi, shuning uchun uni mashinaga o‘tqazib, chekkaroq joyga olib bormoqchi bo‘ldik. Yo‘lda men mashinadan tushib qoldim. Bir necha soatdan keyin shaharda “Elbek Rahimovni o‘ldirib ketishibdi” degan gap tarqaldi. Avvaliga ishonmadim, sheriklarga qo‘ng‘iroq qilsam, hammasining telefoni o‘chirilgan ekan. Keyin Instagram’da xabarlar tarqala boshladi. Shu payt otam keldi, unga hammasini aytib berdim. “Qilgan ishingga yarasha javob berishing kerak”, deb o‘zi ichki ishlar bo‘limiga yetaklab olib bordi. Elbek Rahimov urilgan vaqti boshi yorilgan va ko‘p qon yo‘qotganidan vafot etgan. Birinchi yordam ko‘rsatish uchun qishloq kasalxonasiga olib borishgan ekan, — deydi mahkum.
2022-yil 5-may kuni o‘qilgan sud hukmiga ko‘ra:
Sudlanuvchilarning barchasi Qashqadaryo viloyatida tug‘ilgan bo‘lib, ularning uch nafari voyaga yetmagan shaxs, uch nafari esa ichki ishlar organlarining sobiq xodimlari hisoblanadi.
Sud hukmiga ko‘ra, sudlanuvchilarning 19 nafariga 3 yildan 20 yilgacha ozodlikdan mahrum qilish jazosi tayinlangan bo‘lsa, 1 nafariga 2 yil muddatga ozodlikni cheklash jazosi, voyaga yetmagan shaxslarga 5 yil-u 6 oydan 10 yilgacha bo‘lgan muddatlarga ozodlikdan mahrum qilish jazosi; ichki ishlar organlarining sobiq xodimlariga 3 yildan 8 yilgacha bo‘lgan muddatlarga ozodlikdan mahrum qilish jazosi tayinlangan. Suhbatdoshimiz esa sud hukmiga ko‘ra 9 yil-u 1 oyga ozodlikdan mahrum etilgan. U jinoyatni sodir etganida bor yo‘g‘i 16 yoshda edi.
— Har doim tong saharda yugurishga odatlangandim. Jinoyat sodir etilgan kun, 17-avgustda ham juda kech uyga qaytdim. Bor-yo‘g‘i ikki soat uxlagandim. Uydagilar ham “Charchagansan, uxlab damingni ol”, deyishdi. Rostini aytsam o‘zimning ham oyog‘im tortmadi. Ichimda “qayt” degan ovoz eshitildi, ammo do‘stim uchun borishga qaror qildim. Vaziyat bunday tus olishi xayolimga ham kelmagan. Chunki menda odam o‘ldirish niyati bo‘lmagan, shunchaki ochiqchasiga gaplashib olinadi, deb o‘ylagandim.
Operatsiya qilishganiga endigina 6 oy bo‘lgandi, hatto mashinaga o‘tirib ketayotganimizda yo‘lda tushib qolsammi, deb ham o‘ylaganman. Ammo do‘stimni deb fikrimdan qaytdim. Do‘stim ham qamalgan, faqat muddati menikidan ko‘proq, — deydi mahkum.
Endi afsus nadomatlardan foyda yo‘q. O‘lgan inson qaytib kelmaydi. Bugun to‘rt devor orasida yoshligini o‘tkazayotgan mahkum qilgan ishidan afsuslanadimi?
— Avvaldan o‘zidan kichik yoshdagi bolalarni urib, so‘kishgani yoqmasdi. Elbek Rahimov ham do‘stimning telefonini olib, uni chekkaga olib borib videoga olib tahqirlagan. Biz shunchaki u bilan ochiqchasiga gaplashib, uzr so‘ratmoqchi edik. Uni o‘ldirish niyatimiz bo‘lmagan, — deydi mahkum.
Shu o‘rinda haqli savol tug‘iladi. O‘ziga to‘q, yaxshi oilaning farzandi nega ko‘cha hayotiga kirib qoldi. Nahotki, ota-onasi uning qadamlari o‘zgarayotganini sezmadi. Axir ota-ona hamisha farzandi uchun mas’ul-ku. Ayniqsa, o‘smir yoshda nazoratni yanada kuchaytirish, ularni tashqi omillardan himoya qilish kerak. Nahotki, bir tom ostida yashayotgan ota-onalar yarim tungacha uyga qaytmayotgan o‘g‘lidagi o‘zgarishlarni payqamagan bo‘lsa? Farzandlari kimlar bilan do‘st tutinyapti, vaqtini nimalarga sarflayapti deb qiziqmagan bo‘lsa?
— Ota-onamga quloq solmadim, otam ishlagani uchun tarbiyamiz bilan ko‘proq onam shug‘ullanardi. Ko‘chaga qiziqib qoldim, do‘stimni o‘yladim-u, ota-onamni o‘ylamadim. 15 yoshimda katta janjalga aralashib qolganimda dadam “Oldingda ikkita yo‘l bor, birini tanlasang o‘qib, oila qurasan, farzandli bo‘lib yaxshi ishda ishlaysan. Ikkinchisini tanlasang, uzog‘i 30-35 yoshga borib, qamalasan yoki o‘lib ketasan”, degan. Hammasi u aytganidan ham tezroq sodir bo‘ldi. Ichmasdim, tabiatan bunday insonlardan nafratlanaman. O‘qishim ham yomon emasdi, sport bilan muntazam shug‘ullanardim. Faqatgina qisqa vaqtda to‘g‘ri qarorni qabul qilmaganim hayotimni butunlay o‘zgartirib yubordi.
Elbek Rahimovning ota-onasiga achinaman, bolasining qilib yurgan ishlari uchun ular aybdor emas. Ammo uning nimalar qilganini eslasam, qaytar dunyo bo‘ldimikan deyman.
Sud zalida onam “Bo‘ldi endi yoshliging qolmadi”, dedi. Haqiqatan ham erta ulg‘aydim. Jazo muddatini o‘tab chiqqanimdan keyin hammasini boshidan boshlash niyatidaman. O‘qib, ishlamoqchiman. Sportni davom ettirib, musobaqalarda ishtirok etish niyatim bor.
Tengdoshlarimga har qanday qarorni chiqarishdan avval yaxshilab o‘ylab ko‘rishni, qiziqqonlik qilmaslikni maslahat beraman. Bu ishlarning oxiri voy ekan. Buni panjara ortida o‘tirib yanada chuqurroq his qilyapman, — deydi mahkum.
Izoh (0)