Xitoyda yana bir noodatiy inshoot — parvoz qilayotgan qush shaklidagi yangi aeroport qurilish ishlari olib borilmoqda. Bu haqda Europaplus nashri xabar berdi.
Mazkur aeroport loyihasi Pekindagi MAD Architects byurosi tomonidan Xitoy aeroportlarini rejalashtirish va loyihalash instituti va Pekin arxitektura dizayn instituti bilan hamkorlikda ishlab chiqilgan.
Aeroport o‘zgacha dizayni va fasadi bilan ajralib turadi. Manbalarga ko‘ra, binoning qush shaklida bo‘lishi va tog‘lar orasida qurilishi bino Xitoyning madaniy markazlaridan biriga aylanishiga xizmat qiladi.
Inshoot va unga tegishli hudud 2300 gektarga yaqin maydonni o‘z ichiga oladi. Aeroport binosining o‘zi 12 ming kvadrat metrdan ortiq joyni egallaydi. Uning ichki dizayni yog‘och bilan bezatiladi. Binodagi ulkan derazalar tufayli aeroport terminallari ko‘proq tabiiy yorug‘lik manbayi bilan ta’minlanadi.
Yangi aeroport dastlab yiliga bir million nafar yo‘lovchini qabul qiladi. Ushbu ko‘rsatkich 2030-yilga kelib 5 millionga yetishi kutilmoqda. Qurilish ishlari joriy yilning oxiriga kelib tugallanishi rejalashtirilgan.
Izoh (0)