Oliy Majlis Senati raisi Tanzila Norboyeva Jeneva shahrida Xalqaro mehnat tashkilotining Yevropa va Markaziy Osiyo bo‘yicha byurosi mintaqaviy direktori Beate Andreyes bilan muzokara o‘tkazdi. Bu haqda Senat matbuot xizmati xabar berdi.
Maʼlum qilinishicha, O‘zbekiston va XMT o‘rtasidagi aloqalarni kengaytirish, jumladan, O‘zbekistonda munosib mehnat sharoitlarini tizimli ravishda yaratish borasida hamkorlikni yangi bosqichga olib chiqish masalalari ko‘rib chiqilgan.
Suhbat chog‘ida munosib mehnat va ijtimoiy himoya tamoyillarini joriy etish, norasmiy bandlikka qarshi kurashish, aholining ijtimoiy himoyaga muhtoj qatlamini asosiy daromad bilan taʼminlash, o‘zini o‘zi band qilish standartlarini joriy etish kabi hamkorlik yo‘nalishlariga eʼtibor qaratilgan.
XMTning O‘zbekiston, umuman Markaziy Osiyodagi ishtirokini kengaytirish, konstruktiv muloqot izchilligini taʼminlash maqsadida Toshkent shahrida XMTning xalqaro koordinatori lavozimi tashkil etilgani maʼlum qilingan. Shu bilan birga kelgusida Toshkentda XMTning Markaziy Osiyoning barcha davlatlari uchun submintaqaviy vakolatxonasini tashkil etish yuzasidan fikr almashilgan.
Uchrashuv yakunida XMTning yuqori malakali mutaxassislarini jalb qilgan holda hamkorlikdagi qo‘shma loyihalarni faollashtirishga kelishib olingan.
Izoh (0)