O‘zbekistonliklar uchun Kanadada 5 mingta bo‘sh ish o‘rni taklif etilmoqda

O‘zbekistonliklar uchun Kanadada 5 mingta bo‘sh ish o‘rni taklif etilmoqda. Bu haqda Kambag‘allikni qisqartirish va bandlik vazirligi xabar berdi.

Kanada ish beruvchilari bilan erishilgan kelishuvga ko‘ra, 18 yoshdan 45 yoshgacha bo‘lgan fuqarolar qurilish, xizmat ko‘rsatish va texnik sohalarga ishga taklif etilmoqda.

Qurilish sohasida taklif etilayotgan kasblar:

• duradgor;
• payvandchi;
• elektrik;
• santexnik;
• betonchi;
• oynachi;
• tom yopuvchi;
• pol qoplamalarini yotqizish bo‘yicha yordamchi;
• o‘rmon xo‘jaligi va boshqalar.

Talabgorlar ingliz, fransuz yoki ispan tillaridan birini bilishi lozim. Shuningdek, qurilish kasb-taʼlimi mutaxassisligi bo‘yicha guvohnoma, sertifikat, diplom va xorijga chiqish pasporti nusxasi talab etiladi.

Ish haqi soatiga 12,5 dollardan 30 dollargacha.

Talablarga mos kelmaydigan fuqarolarning nomzodi ko‘rib chiqilmaydi. Har bir nomzod maʼlumotlari ish beruvchi tashkilot vakillari tomonidan ko‘rib chiqiladi va xorijiy tilda suhbatdan o‘tkaziladi.

Talabgorlar quyidagi havola orqali ro‘yxatdan o‘tishi mumkin.

Eslatib o‘tamiz, 2022-yilda sobiq tashqi ishlar vaziri Vladimir Norov Kanadaning mamlakatdagi favqulodda va muxtor elchisi (qarorgohi Moskva shahrida) Elison Meri Lekler bilan Toshkent shahrida Kanada viza markazini ochish masalasini o‘rganishga kelishib olgandi. O‘sha yilning o‘zida O‘zbekistondan Kanadaga mavsumiy ishchilarni yuborish yo‘lga qo‘yilishi mumkinligi to‘g‘risida xabarlar tarqalgan edi.

2024-yilning fevralida o‘zbekistonlik fuqarolarni Kanada mehnat bozoriga jalb qilish mexanizmlarini ishlab chiqish bo‘yicha muzokaralar olib borildi.