Axborot texnologiyalariga qiziquvchi eng faol qizlar Birlashgan Arab Amirliklariga taʼlim sayohatiga yuboriladi. Bu haqda Maktabgacha va maktab taʼlimi vazirligi xabar berdi.
Vazirlik tomonidan o‘quvchilarni IT sohasiga qiziqtirish hamda shu yo‘nalishdagi tashabbuslarni qo‘llab-quvvatlash maqsadida “Raqamli avlod qizlari-2024” Respublika tanlovi bo‘lib o‘tmoqda. Tadbir joriy yilning 29-martiga qadar davom etadi, unda oflayn tarzda 200 nafarga, onlayn shaklda esa 3000 nafarga yaqin qizlar qamrab olindi. Bu yilgi tadbirda:
- Digital Art,
- 3D Modelling,
- Sunʼiy intellekt,
- Startap loyihalar,
- Grafik dizayn kabi yo‘nalishlarda gibrid darslar o‘tkazilmoqda.
Shuningdek, bu yil ilk bora loyiha doirasida “Liderlar maktabi” yo‘nalishi qo‘shilgan bo‘lib, unda mustaqil loyihalar ustida ishlash hamda IT sohasida xalqaro grantlar yutish haqida maʼlumot berilmoqda.
Aytilishicha, bugun mashg‘ulotlardan tashqari, xorijiy va mahalliy spikerlar bilan uchrashuvlar o‘tkazildi. Xususan:
- “Yangi O‘zbekiston” universiteti professsor-o‘qituvchisi, misrlik Islam Elhadary tomonidan “Ayollarning veb dizayn bilan shug‘ullanishi haqida 5 afsona”;
- T&T Progress asoschisi Tursunoy Usmonova tomonidan “Ayol-qizlar uchun chet elda o‘qish grantlari va dasturlari” mavzularida davra suhbatlari tashkil etildi.
Respublika tanlovi mashg‘ulotlarida eng faol qatnashgan qizlar BAAga taʼlim sayohatini qo‘lga kiritishi mumkin.
Izoh (0)