Majburiy ijro byurosi aholini firibgarlardan ogoh bo‘lishga chaqirdi.
Aytilishicha, so‘nggi vaqtlarda ijtimoiy tarmoqlarda fuqarolar tomonidan Majburiy ijro byurosi Telegram orqali qarzi borligi va uni plastik kartochkasi orqali to‘lashi mumkinligi haqida xabarlar kelmoqda. Qarzdorlik to‘g‘risidagi xabarlar qarzdorlarga faqatgina SMS xabar orqali hamda “MIB” ko‘rinishidagi akkauntdan yuboriladi.
Bundan tashqari, byuroning rasmiy dasturiy vositalarini yuklab olish mumkin. Har bir qarzdorlikni byuroning rasmiy veb-sayti orqali tekshirish imkoniyatlari mavjud.
“Ogoh bo‘ling! Shaxsiy raqamlar, ijtimoiy tarmoqlar orqali kelgan qarzdorlikni bartaraf qilish haqida har qanday xabarlar feyk hisoblanadi va Majburiy ijro byurosi tomonidan yuborilmaydi. Hurmatli fuqarolar, shaxsiy ma’lumotlaringizni saqlash, kiberhujumlarning oldini olish maqsadida o‘zingizga taalluqli bo‘lgan ma’lumotlarni rasmiy bo‘lmagan va shubha uyg‘otuvchi platformalarga kiritmasligingizni so‘raymiz.
Eslatib o‘tamiz, qarzdorlik haqidagi har qanday ma’lumotlarni Majburiy ijro byurosining “mib.uz” rasmiy sayti va Byuroda murojaatlarni elektron qabul qilish markazining 1107 qisqa raqami orqali olishingiz mumkin.
Kiberfiribgarlikka qarshi kurashishning eng samarali yo‘li albatta bu fuqarolarimizning huquqiy yoki moliyaviy savodxonligi hisoblanadi. Hozirda bu kabi firibgarlar ishonuvchan va sodda fuqarolarimizni chalg‘itib, o‘z tuzog‘iga tushirishga harakat qilishmoqda”, — deyiladi byuro xabarida.
Izoh (0)