Bosh vazir Abdulla Aripov 25-mart kuni Rossiyaning O‘zbekistondagi elchixonasiga tashrif buyurib, elchi Oleg Malginov orqali butun Rossiya xalqiga taʼziya bildirdi. Bu haqda bosh vazir matbuot kotibi xabar berdi.
Abdulla Aripov avvalroq Rossiya hukumati raisi Mixail Mishustinga Moskva viloyatidagi Crocus City Hall majmuasida sodir bo‘lgan terakt oqibatida ko‘plab insonlar halok bo‘lgani va og‘ir jarohat olgani munosabati bilan hamdardlik maktubini yuborgan edi.
Shuningdek, bugun, O‘zbekiston Oliy Majlisi Qonunchilik palatasi spikeri Nuriddin Ismoilov boshchiligidagi parlament a’zolari Moskva viloyatida sodir etilgan terakt munosabati bilan Rossiyaning Toshkentdagi elchixonasiga tashrif buyurib, Rossiya xalqiga ta’ziya bildirdi.
22-mart kuni kechqurun Moskva viloyatidagi Crocus City Hall konsert zalida terakt sodir etilgan edi. “Piknik” guruhi chiqishidan oldin zalga qurollangan odamlar bostirib kirib, tomoshabinlarga qarata o‘q uzgan. Shundan so‘ng ketma-ket portlashlar va yong‘in boshlangan. Voqea oqibatida kamida 133 kishi halok bo‘lgan, yana 154 kishi jarohatlangan. Rossiya favqulodda xizmatlari vakillari bu yakuniy raqamlar emasligini ta’kidlagan.
Izoh (0)