20-mart kuni prezidentlar va Gollivud aktyorlari uchun turli obrazlar yaratgan mashhur tikuvchi Martin Grinfild vafot etdi. Bu haqda “Pravila jizni” nashri xabar bermoqda. U Nyu-Yorkning Manxasset kasalxonasida hayotdan ko‘z yumdi. O‘lim sabablari oshkor qilinmagan.
Martin Grinfild 1928-yil 9-avgustda Ukrainada tug‘ilgan. O‘smirlik yoshida u nemislar tomonidan tashkil qilingan qirg‘in lageri — Osventimga kelib qolgan va mo‘jiza yuz berib, o‘spirin gaz kamerasidan qochib ketishga muvaffaq bo‘lgan.
Martin konsentratsion lagerda natsist soqchilarning kiyimlarini yuvishga majbur bo‘lgan. Bir kuni kir yuvish xonasida u tasodifan qo‘riqchi ko‘ylagining yoqasini yirtib yuborgan va buning uchun og‘ir kaltaklangan va qo‘riqchi kiyimini bolaga uloqtirgan. Martin ko‘ylakni o‘zida saqlab qolgan va lagerning maxsus formasi ostida ozod bo‘lgunga qadar kiyib yurgan.
Bu holat atrofdagilarning unga bo‘lgan munosabatini o‘zgartirdi va ba’zilar Martin qandaydir imtiyozlari bor deb o‘yladi. Ushbu voqealarni eslar ekan, Martin Grinfild shunday degan:
“Men bu ko‘ylakni birinchi bor kiyganimda kiyimning katta kuchga ega ekanligini anglaganman”.
Foto: The New York Times
Holokost davrini boshidan kechirgach, Martin AQSHga ko‘chib ketdi va 19 yoshida tikuv fabrikasiga farrosh bo‘lib ishga kirdi. Bir necha yillar o‘tib u Bruklinda o‘z do‘konini ochdi. O‘sha davrda tikuvchilik sanoati yaxshi rivojlanmagan edi. Bir necha o‘n yil ichida uning kompaniyasi Qo‘shma Shtatlarning eng mashhur korxonalaridan biriga aylandi va DKNY, Brooks Brothers, Neiman Marcus va Rag & Bone kabi brendlar bilan hamkorlikni yo‘lga qo‘ydi.
Martin Grinfildni “Amerikaning eng yaxshi tikuvchisi” deb atashgan. U AQSH prezidentlari va Gollivud yulduzlariga turli obrazlar yaratgan. Uning mijozlari orasida prezidentlardan Bill Klinton, Donald Tramp va Barak Obama, aktyorlardan Leonardo Di Kaprio, Jonni Depp, Martin Skorseze, qo‘shiqchilardan Maykl Jekson va boshqa ko‘plab mashhur yulduzlar bo‘lgan.
Izoh (0)