Braziliyaning sobiq prezidenti Jair Bolsonaro pandemiya davrida koronavirusga qarshi emlashlar haqidagi ma’lumotlarni soxtalashtirishda ayblanmoqda. Bu haqda tegishli manbalarga tayanib, Euronews xabar berdi.
Yana 16 kishi jinoiy til biriktirish va sog‘liqni saqlash tizimiga yolg‘on ma’lumotlar kiritish ishi bo‘yicha ayblanmoqda. Sobiq davlat rahbari, uning 12 yoshli qizi Laura va boshqa qator sheriklarining emlash dalolatnomalari yolg‘on ekanligi haqida yetarli dalillar to‘plangan. Braziliyaning Folha de São Paulo gazetasiga ko‘ra, politsiya emlash sertifikatining qalbakilashtirilishi to‘ntarishga urinishning bir qismi sifatida amalga oshirilgan deb hisoblagan.
Taxminlarga ko‘ra, Bolsonaro 2023-yilning 8—9-yanvar kunlari poytaxtda ro‘y bergan ommaviy tartibsizliklar vaqtida chet elga vaqtinchalik chiqish uchun zarur hujjatlarni olishni maqsad qilgan. Shundan so‘ng uning tarafdorlari Braziliya Milliy Kongressi, Planalto saroyi va mamlakat Oliy sudiga bostirib kirib, amaldagi prezident Lulaning hokimiyatga qaytishiga to‘sqinlik qilgan.
Men xotirjamman, emlanmaganligimni hamma biladi, — deydi Bolsonaro Reuters agentligiga bergan intervyusida.
2022-yil 30-dekabrda saylovda mag‘lub bo‘lgan siyosatchi AQSHga jo‘nab ketgan va u yerda bir necha oy qolib ketgan edi. El País América nashri Amerika rasmiylari sayohatchilardan COVID-19 ga qarshi emlanganlik sertifikatini taqdim etishlarini talab qilganini aytgan. Pandemiya davrida Bolsonaro emlashga qarshi chiqqan, sog‘liqni saqlash cheklovlarini masxara qilgan va vatandoshlarini undan o‘rnak olishga undagan kam sonli yetakchilardan biri bo‘lgan. Braziliyada 700,000 dan ortiq odam mazkur virusdan vafot etgan.
Agar 68 yoshli siyosatchi sog‘lig‘iga oid ma’lumotlarni soxtalashtirishda aybdor deb topilsa, u 12 yilgacha qamoq jazosiga hukm qilinishi mumkin. Bolsonaro, shuningdek, davlat to‘ntarishiga urinish va 2021-yilda Saudiya Arabistonidan olingan zargarlik buyumlarini o‘g‘irlash aybi bilan tergov qilinmoqda.
Izoh (0)