“Xotin-qizlarning tadbirkorligini yo‘lga qo‘yish va rivojlantirishni qo‘llab-quvvatlashga oid qo‘shimcha chora-tadbirlar to‘g‘risida”gi prezident qarori qabul qilindi, deb xabar beradi Norma.
Xotin-qizlarni kasbga o‘qitish va bandligini taʼminlash, ularni tadbirkorlikka keng jalb etish uchun Tiklanish va taraqqiyot jamg‘armasi hisobidan 2 yillik imtiyozli davr bilan 5 yil muddatga yillik 14 foiz stavkada jami 100 million dollar ekvivalentida kredit resurslari ajratiladi, bunda:
- “Xalq banki”ga — 35 million dollar;
- “Biznesni rivojlantirish banki”ga — 35 million dollar;
- “Mikrokreditbank”ga — 30 million dollar ajratiladi.
Savdo-sanoat palatasi va uchta bankda quyidagilarni nazarda tutuvchi xotin-qizlar tadbirkorligini qo‘llab- quvvatlash tizimi yaratiladi:
- tashabbuskor xotin-qizlarning biznes loyihalarini ishlab chiqishga ko‘maklashish;
- mahallalarda xotin-qizlarni tadbirkorlikka o‘qitish;
- xotin-qizlar tomonidan tayyorlangan mahsulotlarni sotish;
- kooperatsiya asosida loyihalarni amalga oshirishga ko‘maklashish;
- loyihalar amalga oshirilishini kuzatib borish va ayol tadbirkorlar bilan doimiy muloqot qilish.
Shuningdek, daromad topishga qaratilgan muayyan mehnat faoliyati bilan shug‘ullanish va faoliyat turini kengaytirish istagini bildirgan xotin-qizlarni qo‘llab-quvvatlash dasturi ishlab chiqiladi.
Kredit ajratishda ustuvorlik “Ijtimoiy himoya yagona reyestri” axborot tizimiga, “Ayollar daftari”, “Yoshlar daftari” va “Temir daftar”ga kiritilgan xotin-qizlar tomonidan amalga oshirish taklif etilayotgan loyihalarga beriladi.
Hujjat Qonun hujjatlari maʼlumotlari milliy bazasida eʼlon qilingan va 2024-yil 9-martdan kuchga kirdi.
Eslatib o‘tamiz, 2023-yil noyabrda O‘zbekistonda ishsiz xotin-qizlarni ish bilan ta’minlaganlik uchun navbatdagi davlat granti ajratilishi to‘g‘risida xabar berilgandi.
Izoh (0)