Buxoro viloyatining Kogon tumanida avtobus va yuk mashinasi ishtirokida YTH sodir bo‘lgani xabar berilgandi. “Daryo” manbasining bildirishicha, ag‘darilgan avtobus ichida maktab o‘quvchilari bo‘lgan.
Viloyatning Kogon tumanidagi maktablardan birida tahsil oluvchi o‘quvchilar maktab rahbariyatining talabiga ko‘ra, teatr tomoshasiga olib ketilayotganda YTHga uchragan. Bir nafar o‘quvchi vafot etgan.
Manbaning bildirishicha, o‘quvchilar mingan avtobus 2 ta bo‘lgan.
Maktabning 9—11-sinflaridan iborat bolalar 2 ta avtobusga — o‘g‘il bolalar alohida, qiz bolalar alohida joylashtirilgan. Voqea kunduzi taxminan 10:30 lar atrofida sodir bo‘lgan, — deydi YTHga aniqlik kiritgan manba.
Bildirilishicha, o‘quvchilarning ko‘pchiligi teatr tomoshasiga borishni istamasa-da, maktab rahbariyati yuqori sinf o‘quvchi bolalarning har biridan 15 ming so‘mdan yig‘ib olib, ularni viloyat Musiqali drama teatriga olib ketayotgan bo‘lgan.
Ko‘pchilik o‘quvchi teatrga borishni istamagan. Biroq hamma borishi kerak deb, ularni olib ketishayotgan bo‘lgan. Soat taxminan 10:30 larda o‘g‘il bolalar mingan avtobusga sement qoruvchi maxsus avtomobil tegib ketgan. Shunda avtobus ag‘darilgan. Voqea o‘quvchi qizlar ko‘z o‘ngida sodir bo‘lgan — deydi voqea tafsilotini gapirgan manba.
Qo‘shimcha qilinishicha, YTH oqibatida 11-sinf o‘quvchisi (o‘g‘il bola) vafot etgan. Bir necha o‘quvchi og‘ir tan jarohati olib, shifoxonaning jonlantirish bo‘limiga yotqizilgan.
Mas’ullar voqea haqida hech qayerda ma’lumot berishmayapti. Negadir holat yashirilmoqda. YTHdan jabr olganlar juda ko‘p, — deydi axborot beruvchi manba.
“Daryo” jurnalisti YTH haqida qo‘shimcha ma’lumot olish uchun viloyat prokuraturasi axborot xizmati bilan bog‘landi. Mas’ul ayni paytda ularda bu haqda batafsil ma’lumot yo‘qligini, tez orada qo‘shimcha axborot berilishini bildirdi.
Izoh (0)