DXX o‘tkazgan tezkor tadbirda Samarqand va Farg‘ona viloyatlarida sifati kafolatlanmagan hamda tegishli hujjatlari bo‘lmagan dori vositalari savdosiga chek qo‘yildi.
Samarqand viloyatida o‘tkazilgan tadbirda Pastdarg‘om tumanida yashovchi, 1999-yilda tug‘ilgan fuqaro Xitoyda ishlab chiqarilgan 3600 dona “S-Gen” nomli dori vositalarini 46 million so‘mga sotgan vaqtida ushlangan.
Shuningdek, undan mazkur dorilarning go‘yoki davlat ro‘yxatidan o‘tkazilgani to‘g‘risidagi soxta muvofiqlik sertifikati ham ashyoviy dalil sifatida olingan.
Bundan tashqari, uning yashash xonadonidan sifati kafolatlanmagan va tegishli hujjatlari bo‘lmagan 240 dona “ViVaNarin” nomli dori vositasi ham protsessual tartibda rasmiylashtirib olingan.
DXXning Farg‘ona viloyati bo‘yicha boshqarmasi xodimlari tomonidan viloyat bojxona boshqarmasi bilan hamkorlikda o‘tkazilgan tezkor tadbirda esa Qo‘qon shahrida yashovchi, 1989-yilda tug‘ilgan fuqaro umumiy qiymati 121 million 800 ming so‘mlik, 2400 dona “Ampitsillin”, 1600 dona “Infera”, 1600 dona “Ferrovell jeleza gidroksid saxarozniy kompleks” va 125 dona “Gonadotropin xorionicheskiy” nomli dori vositalarini Namangan shahridagi dorixonalarga yubormoqchi bo‘lgan vaqtida ashyoviy dalillar bilan ushlandi.
Sog‘liqni saqlash vazirligi huzuridagi “Farmatsevtika mahsulotlari xavfsizligi markazi” davlat muassasasining xulosasiga ko‘ra, ushbu dorilar dori vositalari va tibbiy buyumlar Davlat reyestriga ro‘yxatga olinmagani hamda Sertifikatlashtirish idoralari tomonidan muvofiqlik sertifikatlari rasmiylashtirilmagani va saqlash sharoitiga amal qilinmagani sabab, ularni respublika hududida sotish, tashish va tibbiyot amaliyotida qo‘llash taqiqlanadi.
Taʼkidlanishicha, mazkur shaxs muqaddam shu turdagi jinoyatni sodir etgani uchun 2023-yil Maʼmuriy javobgarlik to‘g‘risidagi kodeksning 165-1-moddasi bilan jarima jazosiga tortilgan.
Izoh (0)