Ukrainaga ajratiladigan 300 million dollarlik yordam paketi doirasida Pentagon Stinger odam-portativ havo mudofaa tizimlari (MANPADS), HIMARS uchun o‘q-dorilar, turli artilleriya snaryadlari va boshqa qurollarni topshirish niyatida. Bu haqda Pentagon matbuot kotibi Pat Rayder brifingda ma’lum qildi.
“Ushbu paket yordamning 55-transhi bo‘lib, 300 million dollargacha baholanmoqda. U Ukrainaning havo mudofaasi, artilleriya va tankka qarshi qurollarga bo‘lgan ehtiyojlarini o‘z ichiga oladi”, — deyiladi Pentagon saytida.
Paketga Stinger MANPADS, HIMARS raketa tizimlari uchun o‘q-dorilar, 155 mm artilleriya snaryadlari, shu jumladan, yuqori portlovchi, ikki tomonlama takomillashtirilgan kassetali o‘q-dorilar (DPICM), 105 mm snaryadlar va AT4 tankka qarshi granata otish moslamalari kiradi.
Rayderning ta’kidlashicha, yordam AQSH hukumati o‘z zaxiralarini kutilganidan ham qulayroq shartlarda to‘ldirish uchun qurol sotib olish bo‘yicha shartnomalar tuzgani uchun ajratilgan. Uning so‘zlariga ko‘ra, bu AQSHning Kongressda ko‘rib chiqish bosqichida turgan to‘liq yordam paketining o‘rniga emas, balki alohida yordamdir.
Ukrainada urush boshlangandan beri AQSH, Mudofaa vazirligining hisobotida ko‘rsatilganidek, Kiyevga 44,2 milliard dollar yubordi. Ikki yil ichida Ukrainaga Patriot havo mudofaa tizimi, 2 mingdan ortiq Stinger MANPADS, 12 NASAMS, 31 Abrams tanklari va 45 T-72B tanklari, 20 Mi-17 vertolyotlari va boshqalar yuborildi.
2023-yil oktyabr oyidan beri Kongress Ukrainaga moliyaviy yordam ko‘rsatish loyihasini muhokama qilmoqda. Dastlab Ukraina (60,06 milliard dollar), Isroil (14,1 milliard dollar) va Tayvanni (4,83 milliard dollar) qo‘llab-quvvatlash uchun 118 milliard dollar ajratish, shuningdek, AQSH chegaralarini mustahkamlash choralari (20,23 milliard dollar) ko‘zda tutilgan.
Fevral o‘rtalarida Senat Ukraina, Isroil va Tayvanga 95 milliard dollarlik yordam ajratadigan hujjatni ma’qulladi. Vakillar palatasi hali bu tashabbusni ko‘rib chiqmagan.
Izoh (0)