Kamerun futbol federatsiyasi (Fecafoot) dushanba kuni mahalliy chempionatning pley-off bosqichiga yo‘llanma olgan futbolchilar ro‘yxatini e’lon qildi.
Ushbu ro‘yxatdan 62 nafar futbolchi o‘rin olmagan.
Sky Sport Italia nashrining xabar berishicha, ular yoshi haqidagi ma’lumotlarni soxtalashtirganlikda ayblanmoqda. Aynan shu sabab ular musobaqalardan chetlatilgan.
Futboldan chetlatilganlar orasida 17 yoshli Uilfrid Natan Duala ham bor. Futbolchi AFCON musobaqasiga chaqirilgan eng yosh o‘yinchi sifatida e’tirof etilgan edi, ammo Fransiyaning Le Monde gazetasi o‘tkazilgan tekshiruvdan so‘ng uning yoshi va shaxsiga shubha bilan qaragandi. Ularning ta’kidlashicha, u ilgari Kamerun Ligasida Aleksandr Bardelli nomi bilan o‘ynagan va musobaqa paytida kamida 23 yoshda bo‘lgan. Duala AFCON musobaqasida ishtirok etmadi. Le Monde nashri Fedaratsiyadan tushuntirish talab qilgan, biroq ular o‘sha paytda izoh berishdan bosh tortishgan.
Diskvalifikatsiya tufayli jami 15 ta klub futbolchilaridan ayrildi. Klublardan birining 13 nafar o‘yinchisi chetlatilgan. Uilfrid Natan Duala o‘ynayotgan “Viktoriya Yunayted” yetti nafar vakilidan ayrildi.
Seshanba kuni bo‘lib o‘tgan matbuot anjumanida Fecafoot bosh kotibi Blez Jounang bu “vaqtinchalik vaziyat” ekanligini aytdi va vaziyatni o‘zgartirishi mumkin bo‘lgan so‘rovlar bo‘layotganini ta’kidladi.
Izoh (0)