Toshkentda Osiyo ot sporti federatsiyasining navbatdagi bosh assambleyasi o‘tkazildi

5—8-mart kunlari Toshkentda  Osiyo ot sporti federatsiyasining navbatdagi bosh assambleyasi bo‘lib o‘tdi. Mazkur tadbir O‘zbekiston ot sporti tarixida birinchi marta o‘tkazilishi hisoblanadi.

O‘zbekiston Respublikasi yilqichilik va ot sporti federatsiyasi 2023-yil 25—28-fevral kunlarida Qatar davlatining Doha shahrida o‘tkazilgan assambleyada keyingi yig‘ilishni O‘zbekistonda o‘tkazish huquqini olgan edi. Ushbu tadbir O‘zbekiston ot sporti tarixida ilk marotaba o‘tkazilmoqda. 

“Toshkentdek chiroyli shaharga taklif qilgani, ajoyib tayyorgarlik va mehmondorlik uchun O‘zbekiston hukumatiga rahmat. Bu yil hisobida bu tadbir biz uchun juda muhim edi.

O‘zbekistonga birinchi marotaba kelishimiz. O‘tkazilgan tadbirlar davomida guruhlar uchun kichik tayinlovlar o‘tkazdik. Shuningdek, ayrim aʼzolari bilan taqdimotlarni ham tashkil qildik. 

Uchrashuvlarda biz Osiyoning barcha jamoalarini ko‘rdik. Menimcha, bu jamoalar tezkorlikda rivojlanib borishyapti, biz ularni haqiqatda qo‘llab-quvvatlash jarayonidamiz. Qolaversa, mintaqa miqyosida bu jamoalarni saralash rejamiz ham bor. O‘zbekiston ot sporti jamoalari haqida gapirsak, ular juda yaxshi ishlashmoqda. Kelgusi 3—4-yilda ular Ot sporti federatsiyasining qo‘llovi bilan dunyo mamlakatlarining eng yaxshi vakillari bo‘lib musobaqalarda ishtirok etishiga ishonaman”, — dedi Osiyo ot sporti federatsiyasi prezidenti shayx-Hamad al-Attiyax.

O‘zbekiston yilqichilik va ot sporti federatsiyasi Raisi Bahromjon Gaziyev ot sportining yutuqlari haqida gapirdi:

“Kecha Osiyo ot sporti raisi kubogini o‘tkazdik. Dunyoning turli mamlakatlaridan kelgan mehmonlar bu tadbirni tomosha qilishdi, chavandozlarimizni, otlarimizni, yangi qurilayotgan maskanimizni ko‘rishdi. 

2023-yilning noyabr oyidan mart oyigacha Arab davlatlarida musobaqalarda qatnashib keldik. Qatarda, Abu Dabida, Dubayda o‘tkazilgan musobaqalarda yaxshi natijalarga erishib keldik. Hozir Yevropa davlatlarida, Rossiyaning baʼzi shaharlarida otlarimiz bor, xalqaro musobaqalarda qatnashib O‘zbekiston bayrog‘i yuqori ko‘tarilishiga hissa qo‘shishyapti”. 

Bosh Assambleya majlisida 38 ta Osiyo ot sporti federatsiyasiga aʼzo federatsiyalar Rais va Bosh kotiblari ishtirok etishdi. 

Osiyo ot sporti federatsiyasi Bosh kotibi Badr bin Muhammad Al Darvish O‘zbekistonda ot sportining kelajagini yuqori baholadi:

“Iliq va samimiy mehmondo‘stlik uchun O‘zbekistonga minnatdorchilik bildiraman. Tadbir juda chiroyli, muloqotlarga boy o‘tyapti. Bu yerda ot sportiga qiziqish juda kattaligi ko‘rinib turibdi, ayniqsa yoshlar orasida bu sport turining kelajagi yaxshi natijalardan darak beradi. Kecha tadbir ishtirokchilariga ot sporti bilan shug‘ullanuvchi yoshlar guruhining o‘yinlari namoyish etildi. Bu chiqishlar bizni hayratda qoldirdi. Agar solishtiradigan bo‘lsak, Markaziy Osiyo mamlakatlari orasida o‘zbekistonlik sportchilar yetakchi hisoblanadi”, dedi u.

Anjuman davomida 2026-yilda Yaponiyaning Nagoya shahrida o‘tkaziladigan 20-yozgi Osiyo o‘yinlari doirasida ot sporti taqdimoti o‘tkazildi va muhokama qilindi.

Reklama huquqi asosida