2014-yildan buyon yig‘ilayotgan ma’lumotlarga ko‘ra, 2023-yilda dunyo bo‘ylab migratsiya yo‘llarida eng ko‘p odam halok bo‘lgan. Bu haqda BMT Xalqaro migratsiya tashkilotining (XMT) “Yo‘qolgan muhojirlar” loyihasi o‘zining X ijtimoiy tarmog‘idagi sahifasida xabar berdi.
Xabarga ko‘ra, BMT Xalqaro migratsiya tashkilotining (XMT) bedarak yo‘qolgan muhojirlar loyihasi 2023-yilda jami 8565 nafar muhojir halok bo‘lganini qayd etgan, bu 2022-yilga nisbatan 20 foizga ko‘p. Avvalgi eng yuqori ko‘rsatkich 8 084 o‘lim bilan 2016-yilda qayd etilgan.
Migrantlarning 50 foizga yaqini suvda cho‘kish, to‘qqiz foizi avtohalokatlar va yetti foizi zo‘ravonlik oqibatida halok bo‘lgan.
10 yil avval “Yo‘qolgan muhojirlar” loyihasi boshlanganidan beri halok bo‘lgan 63 700 dan ortiq odamning deyarli yarmi O‘rta Yer dengizida halok bo‘lgan. Mazkur maʼlumotlarga ko‘ra, O‘rta Yer dengizi eng xavfli migratsiya yo‘li bo‘lib qolmoqda, o‘tgan yili u yerda kamida 3129 nafar kishi, 2024-yilning ikki oyida esa 254 nafar muhojir halok bo‘lgan.
XMTning ta’kidlashicha, statistik ma’lumotlarga faqat tasdiqlangan o‘limlar kiritilgani sababli haqiqiy raqamlar sezilarli darajada yuqori bo‘lishi mumkin. Misol uchun, muhojirlarni noqonuniy tashish bilan shug‘ullanadigan kema tunda qirg‘oqdan chiqib ketsa va keyinchalik hech qayerda ko‘rinmasa, kemadagi odamlarning o‘limi hujjatsiz qoladi.
XMTning “Yo‘qolgan muhojirlar” loyihasi 2014-yilda Italiyaning O‘rta Yer dengizidagi Lampeduza oroli qirg‘oqlarida ikki kema halokatga uchrashi oqibatida ko‘plab qurbonlar bo‘lganidan keyin boshlangan edi.
Izoh (0)