“Tolibon” Ichki ishlar vazirligi Afg‘oniston janubidagi Hilmand viloyatida 587 gektar afyun ekiladigan yer yo‘q qilinganini ma’lum qildi.
Shuningdek, “Tolibon”ning narkotiklarga qarshi kurash politsiyasi Qandahor va Uruzgon viloyatlaridagi 58 gektar yer ham afyundan tozalangani haqida xabar berdi.
“Tolibon” taqiqlaganiga qaramay, Afg‘onistonda, ayniqsa, mamlakat janubida tarkibida giyohvand modda bor o‘simliklar yetishtirish davom etmoqda.
“Tolibon” yetakchisi Haybatulloh Oxundzoda ikki yil avval Afg‘onistonda giyohvand moddalar yetishtirish, ishlab chiqarish va sotishni taqiqlovchi farmon chiqargan edi.
“Tolibon” rasmiylari Afg‘onistonda afyun yetishtirish tugatilganini bir necha bor daʼvo qilgandi, biroq ular giyohvand moddalar ekilgan yerlar tozalangani haqida xabar berishda davom etmoqda.
Birlashgan Millatlar Tashkilotining Giyohvand moddalar va jinoyatchilik bo‘yicha boshqarmasi ham Afg‘onistonda giyohvand moddalar yetishtirish 90 foizga kamayganini ma’lum qilgan.
Ushbu boshqarma, shuningdek, giyohvand moddalar yetishtirishning kamayishi daromadi shunga bog‘liq bo‘lgan qishloq dehqonlarini qiyin ahvolga solib qo‘yganini va shuning uchun boshqa mahsulotlar yetishtirish juda muhimligini ta’kidlagan.
Izoh (0)