Ijtimoiy himoya milliy agentligi fevraldagi nafaqa va moddiy yordam to‘lovlari haqida ma’lumot berdi.
Ma’lum qilinishicha, 2024-yilning fevral oyida jami nafaqa va moddiy yordam to‘lovlari uchun 1 403,2 milliard so‘m mablag‘ to‘lab berildi. Ijtimoiy himoya milliy agentligi tomonidan joriy yilning fevral oyida:
- kam ta’minlangan oilalarga bolalar nafaqasi va moddiy yordam oluvchi 1 728,9 ming ta oilalarga 817,7 milliard so‘m;
- ijtimoiy nafaqa oluvchi – 659,8 ming nafar fuqaroga 514,9 milliard so‘m;
83,2 ming nafar fuqaroga esa bir martalik nafaqalar uchun 70,6 milliard so‘m mablag‘lar to‘lab berildi.
Joriy yilning mart oyi to‘lov ro‘yxatlariga kiritilgan 4 million nafar pensiya oluvchilar uchun talab etilgan mablag‘lar 5-mart kuniga qadar tijorat banklariga to‘liq moliyalashtirib berildi. O‘z navbatida, pensiya to‘lovlarini naqd pulsiz shaklda oluvchi 3,1 million nafar (yoki jami oluvchilarning 77 foizi) fuqarolarning bank kartalariga mablag‘lar to‘liq yuklab berilishi taʼminlandi.
Avvalroq 2024-yil 1-yanvarda respublikada pensiya oluvchilarning umumiy soni 3 million 930 ming 400 nafarga yetgani, bu aholining 10,7 foizini tashkil etishi xabar qilingan. Pensiya jamg‘armasi davlat pensiyalarining barcha turlari uchun yillik 53,5 trillion so‘m to‘lamoqda. Bunda bir oylik o‘rtacha xarajatlar miqdori qariyb 4,5 trillion so‘mni tashkil etadi.
Eslatib o‘tamiz, joriy yil yanvariga qadar jamg‘arma tasarrufida nafaqalar to‘lovi ham bor edi. 2023-yil 1-iyundagi prezident farmoniga muvofiq, 2024-yil 1-yanvardan boshlab qator ijtimoiy to‘lovlar Ijtimoiy himoya milliy agentligi tasarrufiga o‘tkazildi.
Bunda ijtimoiy to‘lovlar uchun ariza berish, ularni ko‘rib chiqish, tayinlash va to‘lashning amaldagi tartibi saqlab qolinadi. Endilikda fuqarolar mazkur ijtimoiy to‘lovlar bilan bog‘liq barcha savollariga tuman yoki shaharlardagi “Inson” ijtimoiy xizmatlar markazlariga murojaat qilishlari mumkin.
Ma’lumot uchun, “2024-yil uchun O‘zbekiston Respublikasining davlat byudjeti to‘g‘risida”gi qonunda joriy yilgi ish haqi, pensiyalar, stipendiyalar va nafaqalar miqdorini, shuningdek, ayrim xizmatlar turlari bo‘yicha tariflarni oshirish bilan bog‘liq xarajatlar uchun qo‘shimcha 9,5 trillion so‘m ajratilishi belgilangan. Xususan, 2024-yilda Pensiya jamg‘armasiga 16 trillion so‘m mablag‘ yo‘naltiriladi.
Izoh (0)