O‘zbekiston prezidenti yordamchisi Saida Mirziyoyeva Jahon banki eʼlon qilgan maʼlumotlarga ko‘ra, O‘zbekiston dunyo bo‘yicha gender tengligi sohasida eng samarali rivojlanayotgan davlatlar beshtaligiga kirgani yuzasidan fikr bildirdi.
Saida Mirziyoyeva bunday natijaga erishishga ayollarni zo‘ravonlik va kamsitishdan himoya qilish borasida qabul qilingan qonunlar sabab bo‘lganini qayd etdi.
“Albatta, biz birdaniga eng rivojlangan ongli jamiyatda yashay boshladik, zo‘ravonlikni tag-tugi bilan yo‘q qildik, deya olmaymiz. Bu — qonunlarni hayotga doimiy tatbiq qilish, mehnat faoliyati uchun barchaga birdek sharoit yaratish, teng iqtisodiy imkoniyat berish ustida tinimsiz ishlashimiz zarur, degani.
Biz bugun shunday darajaga yetdikki, xotin-qizlarga faqat kvotalar va alohida imtiyozlar berishning o‘zi kamlik qiladi. Men jamiyatimizda amalda ayollarga mutlaqo teng imkoniyatlar beradigan tizimli o‘zgarishlar bo‘lishini istardim.
Har kuni zo‘ravonlik va eskicha qarashlarga qarshi kurashib, temir to‘siqlarni sindirib, mashaqqatli islohotlarimizni amalga oshirishga hissa qo‘shayotganlar haqiqiy qahramonlik ko‘rsatmoqda. Bunday insonlarning har biriga rahmat deyman”, — deb yozadi prezident yordamchisi.
Avvalroq O‘zbekiston Jahon bankining “Ayollar, biznes va qonun 2024” indeksida eng ilg‘or o‘zgarishlarni amalga oshirgan davlatlar qatoriga kirgani haqida xabar berilgan edi.
Izoh (0)