Toshkent viloyati hokimi Zoir Mirzayev Bekobod tumanidagi “Istiqlol” va “Bahor” madaniyat markazlari 10 yildan beri qarovsiz yotganini, bu yerga hech kim kirib-chiqmasligini, ammo shtatlar borligi, xodimlari oylik olayotganini aytdi. Bu haqda viloyat rahbari madaniyat va san’at sohasi vakillari bilan uchrashuvida gapirgan.
Bekobod tumanining “Bunyodkor” mahallasidagi “Istiqlol”, “Uyas” mahallasida joylashgan “Bahor” madaniyat markazlari 80-yilda qurilgan. Ushbu madaniyat markazlari binosi avariya holatida bo‘lgani uchun 2014-yildan beri bu zalga hech kim kirmaydi. Mana holati, — deydi madaniyat markazlari suratlarini ko‘rsatgan hokim.
Zoir Mirzayev qarovsiz madaniyat markazlari ayni kunda foydalanilmayotgan bo‘lsa-da, bu yerda ishlovchilar borligini, hozirgi kungacha maosh olinayotganini bildirdi.
Ikkita madaniyat markaziga ham odam kirmaydi. Lekin bu yerda shtat bor, oylik olayotgan odam bor. Ular nimaga oylik olyapti? Ularning ishxonasi qayerda? Hech kim kelmas ekan, oylik yozilarkan. Bu yerda moliyaviy qonunbuzilishi ham bor-ku, — deydi viloyat rahbari.
Hokim qarovsiz va xaroba bo‘lib yotgan madaniyat markazlarini ishga tushirish, u yerga aholini jalb qilish haqida gapirar ekan, mas’ullar “open budjet” loyihasi orqali bo‘lsa-da, madaniyat markazlarini ta’mirlashga erishishlari kerakligini uqtirgan.
Madaniyat markazlarini bir kun o‘qitish kerak-da, “open budjet” degan tashabbusli budjetga kiringlar, baraka topgurlar. Bu tashabbusda yutsa bo‘ladi. Toshkent viloyatiga “open budjet” bo‘yicha 800 milliard so‘m mablag‘ ajratilgan. Nimaga shu madaniyat markaziga mas’ul odam shu loyihaga kirmaydi? Madaniyatli qilib, odamlarga targ‘ib qilsa, odamlar jon deb shunga ovoz beradi. Lekin bunga harakat ham yo‘q. Hech bo‘lmasa shuning bir qismini, ikkita xonasini bo‘lsa-da, ta’mirlab o‘sha odamni olib kirib qo‘ysa ham bo‘lardi. Bu tarzda egasiz qilib qo‘yish kerak emas-ku, — deydi viloyat hokimi.
Izoh (0)