Huquqni muhofaza qiluvchi idoralar tomonidan farg‘onalik “Hizb ut-tahrir al-islomiy” diniy ekstremistik oqimi aʼzosi qo‘lga olinib, sud hukmi bilan 7 yil muddatga ozodlikdan mahrum etildi. Bu haqda O‘zA xabar berdi.
Marg‘ilonlik Vahob Akramov 1999-yilda “Hizb ut-tahrir” tashkilotiga qasamyod qilib, uning safiga kirgan. Jamoat joylarida, bozorlarda diniy oqimning varaqalarini tarqatib kelgan chog‘da qo‘lga tushgan. Bu qilmishi uchun Jinoyat kodeksining 159-moddasi 3-qismi “b” bandi (O‘zbekiston Respublikasining konstitutsiyaviy tuzumiga tajovuz qilish uyushgan guruh tomonidan yoki uning manfaatlarini ko‘zlagan holda sodir etilgan bo‘lsa) bilan aybli deb topilib, 6 yil muddatga ozodlikdan mahrum qilish jazosi tayinlangan.
Vahob Akromov ozodlikka chiqqach, oila-aʼzolarini olib, noqonuniy yo‘l bilan qo‘shni Qirg‘iz Respublikasiga qochib o‘tadi. U xavfli retsidivist bo‘lgani holda “Hizb ut-tahrir” xalqaro terroristik tashkilotiga sodiqlik qasamyodini qabul qilgan. Shundan so‘ng O‘zbekiston hududida, keyinchalik butun dunyoda shariat qonunlariga asoslangan xalifalik davlatini qurish bilan bog‘liq jinoiy harakatini davom ettiradi.
Qirg‘iz Respublikasida bu tashkilotning aʼzolari bilan uchrashib, jonli “halqa” yig‘inlarida ishtirok etgan. Shu bilan birgalikda tashkilot safiga yangi aʼzolarni jalb etish va qabul qilingan aʼzolarga diniy taʼlim berish ishlari bilan shug‘ullangan. U “masʼul” lavozimga tayinlanib, O‘zbekistonda, xususan, Farg‘ona viloyati Bag‘dod va Buvayda tumanlarida tashkil etilgan tashkilot “halqa”sining aʼzolari sanalgan M.Soliyev, P.Soliyev, X.Mamajonov, G‘.Bekmirzayev va boshqalarga diniy ekstremistik ruhdagi adabiyotlardan saboq berib kelgan.
Jinoyat ishlari bo‘yicha Bag‘dod sudi tomonidan Vahob Akramovning jinoyat ishi ko‘rib chiqilib, sud hukmi o‘qilgan.
Izoh (0)