Xalq deputatlari Guliston shahar Kengashining navbatdan tashqari sessiyasi bo‘lib o‘tdi. Unda Sirdaryo viloyati hokimi Akmal Mahmudaliyev ishtirok etdi, deb xabar beradi viloyat hokimligi matbuot xizmati.
Hududdagi ahvol keskin tanqid qilingan sessiyada shaharning ijtimoiy-iqtisodiy sohalarida mavjud qator muammolar, yo‘l qo‘yilgan kamchiliklar sanab o‘tilgan. Xususan, aholi murojaatlarini hal etish, obodonlashtirish bo‘yicha ishlar qoniqarsizligi, shahar master rejasi oxiriga yetkazilmagan, eksport masalasida ahvol yomon ekani, ayniqsa, qurilish ishlarida o‘zibo‘larchilikka yo‘l qo‘yilayotgani keskin tanqid qilingan.
Viloyat hokimi Akmal Mahmudaliyev Guliston shahar hokimi lavozimiga Jamoliddin Xojimanov nomzodini tavsiya qilgan. Xalq deputatlari Guliston shahar Kengashining qarori bilan u Guliston shahar hokimi etib tayinlandi.
Jaloliddin Xojimanov 1987-yilda Sardoba tumanida tug‘ilgan. Maʼlumoti – oliy. 2011-yil Toshkent davlat agrar universitetini tamomlagan. Mutaxassisligi buxgalteriya hisobi va audit.
U mehnat faoliyati davomida Toshkent viloyati va Toshkent shahrida moliya va iqtisodiyot sohalarida turli tashkilotlarda masʼul vazifalarda ishlagan. Tayinlovga qadar Chilonzor tuman hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — iqtisodiy taraqqiyot va kambag‘allikni qisqartirish bo‘limi boshlig‘i lavozimida faoliyat yuritib kelayotgan edi.
2019-yil fevraldan buyon Guliston shahri hokimi lavozimida ishlab kelgan To‘lqinjon Dadabayev fevral oyi boshlarida sog‘ligidagi muammolar sabab o‘z arizasiga binoan lavozimdan ozod etilgan, shahar hokimi vazifasini vaqtincha bajarish shahar hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari G‘ayrat Botirovga yuklangan edi.
Izoh (0)