Ehtimol, begonalarga qo‘l mehnati yordamida tayyorlangan kutilmagan sovg‘alar berish eng zo‘r g‘oya bo‘lmasligi mumkin. Ammo onalarga aynan shunaqasi manzur bo‘lishi shubhasiz. Ularga hadya qilingan hamma narsa mehr-muhabbatning belgisidir. Agar siz bir soatdan ko‘proq vaqtingizni sarflab, bunday sovg‘a yarata olsangiz, u olmos va zumraddan ham qimmatroqdir. Shuning uchun, yengingizni shimarib oling! Bizning g‘oyalarimiz orasida siz, albatta, onangizga nima yoqishini tanlaysiz va buni o‘zingiz bajara olasiz.
Fotosuratli kalit
Hatto oilaning eng kichik aʼzosi ham onasiga 8-mart kuni o‘z qo‘llari bilan bolalar sovg‘asini yasashi mumkin. Ushbu klassik sovg‘a qimmatli bo‘ladi va onaga hayotining yoqimli daqiqalarini eslatadi.
Buning uchun sizga tekis plastik brelok, onangizning sevimli fotosurati 3x3 sm va chiroyli tasma (qadoqlash uchun) kerak bo‘ladi. Kichkintoydan onasi uchun sovg‘a tayyor!
Pledlar uchun hunarmandchilik savatchasi
8-mart uchun ushbu foydali sovg‘a onalar, buvilar va dugonalar tomonidan qadrlanadi.
Sizga kerak bo‘ladi:
- dumaloq plastik ish yuritish uchun chiqindi qog‘oz savati;
- mato bo‘yog‘i —1 banka;
- jut arqonining bir nechta shingillari;
- bir parcha mato (paxta, atlas, muslin, kanvas);
- issiq yopishtirgich (pistolet) va yopishtiruvchi tayoqchalar;
- bo‘yoq cho‘tkasi.
Yasalishi:
Bularning barchasi bilan siz bir soatdan kamroq vaqt ichida zamonaviy arqon savatini yasashingiz mumkin. Issiq yopishtiruvchi pistoletdan foydalanib, matoni savatning tagiga yopishtiring, chetlarini qatlab tekislab keting.
Yonlaridan ortiqcha materialni kesib oling va matoni savatning yuqori qismiga yopishtiring. Tepadagi kigizni kesib tashlashni istamasangiz, keyinroq ishlatasiz.
Savatning tagidan boshlab, ipni issiq yelim bilan yopishtiring va butun savatni o‘rab oling. Ip savatning tepa qismi chetiga to‘g‘ridan to‘g‘ri tiqilib qolganda yelimlashni to‘xtating.
Matoni savat ichiga soling va arqonni tashqi tarafdan o‘rang.
Yelim qilingan joylar quriganidan so‘ng, bo‘yoq cho‘tkasini bo‘yoqqa botirib oling va arqon o‘ramiga “gradient” texnikasini qo‘llang. Quyuq soya qanchalik pastda bo‘lsa, balandlagan sari rang ochroq bo‘lishi kerak.
Ishonchimiz komilki, bunday sovg‘a quvonch bilan qabul qilinadi.
“Eng yaxshi ona” kubogi
Agar bola 8-mart kuni onasiga o‘z qo‘llari bilan yasalgan buyumni sovg‘a qilishni istasa, siz ushbu g‘oyani taklif qiling. Har qanday chashkani akril bo‘yoq bilan tekis rangga bo‘yab, “Eng yaxshi onaga” degan chiroyli yorliqni yopishtiring. Karton qog‘ozdan “kubok” uchun “podstavka” yasashingiz mumkin. Ushbu sovg‘ani vaza sifatida ham ishlatsa bo‘ladi.
Quroq yopinchiq
8-mart uchun sovg‘ani o‘z qo‘lingiz bilan tikishingiz mumkin. Hatto siz hech qachon mato kesmagan, tikish-bichishni umuman o‘rganmagan bo‘lsangiz ham. O‘zingiz yoqtirgan rangdagi matolarni tanlang: bu yangi mato bo‘laklari yoki xizmat muddatini o‘tagan narsalarning qismlari bo‘lishi mumkin (masalan, futbolkalar).
Sizga kerak bo‘ladi:
- matolar;
- iplar;
- ignalar (yoki tikuv mashinasi);
- qaychi;
- o‘lchagich va bo‘r;
- sintepon.
Qanday tikiladi:
Matoni bir xil o‘lchamdagi kvadratlarga kesib oling. Noyob naqsh yaratish uchun ularni tikib chiqing. Yodda tutingki, sizga ikkita tayyor quroqdan tikilgan mato kerak bo‘ladi. Matolar orasiga sinteponni bir tekis qilib yoyib chiqing. Dastavval, barcha qirralarni tikib qo‘ying. Yopinchiqni katta choklar bilan kvadrat shaklida tikib chiqing. Ushbu qo‘lda tikilgan adyol bilan yaqinlaringizni xursand qiling.
Jurnal stoli uchun dekorativ savat
O‘quvchilar o‘z qo‘li bilan 8-mart kuni o‘qituvchisiga deyarli mustaqil ravishda sovg‘a yasashi mumkin. Agar u yaxshi o‘qituvchi bo‘lsa, bolaning harakatlarini qadrlashi lozim.
Sizga kerak bo‘ladi:
- yupqa karton bo‘lagi;
- jut arqonining bir qismi;
- issiq yopishtirgich (pistolet) va yopishtiruvchi tayoqchalar;
- mato bo‘yoqlari (ixtiyoriy).
Qanday yasaladi:
Kartonning pastki qismini, kerakli diametrda kesib oling. Ishni pastki qismini shakllantirishdan boshlang. Yelimlangan ipning bir uchini pastki qismning o‘rtasiga yopishtiring va doiralar hosil qiling. Yelim quriguncha mahkam ushlang.
Pastki qismi tayyor bo‘lgach, idishning yon devorlarini arqonni yelimlab aylantirib o‘ragan holda hosil qiling. Idish chiroyli shaklga ega bo‘lishi uchun devorlar baland bo‘lmasligi kerak (arqonning 3-5 burilishi balandlik qiladi). Ipning uchini ichkaridan idishning devoriga tiqib mahkamlab qo‘ying. Va bezaklar berish — bu yog‘i didingiz va tasavvuringizga havola. Siz uni turli xil ranglar bilan bo‘yashingiz, biserlar tikib, sunʼiy patlar, tasmalar bilan bezang.
To‘qilgan sharf
Bahorning ilk kunlari ob-havo hali barqaror emasligi sababli, 8-mart uchun mustaqil sharf to‘qib yaqiningizga sovg‘a qiling. To‘qishda professional yoki boshlang‘ich bo‘lasizmi, sharf kundalik hayotda haqiqatan ham foydalaniladigan ajoyib buyumdir.
Sizga kerak bo‘ladi: qayrilgan ignalar (kryuchok yoki spitsa), iplar va sabr. Siz eng oddiy naqshni tanlashingiz mumkin. Ushbu naqsh bunday loyihalar uchun eng ko‘p qo‘llanilgan. Sovg‘a qilmoqchi bo‘lgan insoningizning sevimli rangidagi ipni tanlang va mehr bilan to‘qishni unutmang.
Biserli bilaguzuk
Qizlar bolaligidan zargarlik buyumlarini yoqtiradi. Maktab bolalari ham o‘z qo‘llari bilan 8-mart kuni sinfdosh qizlarga sovg‘a tayyorlashi mumkin. Chiroyli bilaguzuk yasash uchun zarur bo‘lgan iplar va qisqichlar bilan birga har qanday hunarmandchilik do‘konidan chiroyli munchoqlar topsa bo‘ladi. Bu nafaqat bilaguzuk, balki marjon, hatto belbog‘ ham bo‘lishi mumkin. Vaqt va xohish bo‘lsa, xuddi shu uslubda zargarlik buyumlarining butun to‘plamini yarata olasiz. Sinab ko‘ring!
Kosmetika uchun sumkacha
Agar siz unga ozgina yordam bersangiz, kichik rassom ham buni qila oladi. O‘z qo‘llaringiz bilan yasalgan kosmetika uchun sumkacha 8-mart kuni qizlar uchun ajoyib sovg‘adir.
Sizga kerak bo‘ladi:
- oq matoli kosmetika uchun sumkacha yoki qalam qutisi;
- matoni bo‘yash uchun bo‘yoqlar;
- cho‘tka;
- qog‘ozli likopcha yoki bo‘yoq palleti;
- nam qog‘oz sochiq.
Qanday bezak beriladi:
O‘zingizning noyob mavhum naqshingizni yarating va uni cho‘tka bilan kosmetik sumka (yoki qalam qutisi) matosiga qo‘llang. Natija yengil, chiroyli bo‘lib chiqishi uchun cho‘tkaning mato ustidagi harakatlari xuddi “supurish”ga o‘xshagan bo‘lishi kerak. Sanʼat asarini yaratgach, bo‘yoqni biroz quriting, (2-3 daqiqa). Keyin ranglarni muloyimlik bilan aralashtirish va cho‘tka izlarini silliqlash uchun nam sochiqdan foydalaning Mana, haqiqiy badiiy abstraksiya!
Oila daraxti plakati
Farzandingizga 8-mart kuni buvisiga sovg‘a yaratishda yordam berishingiz mumkin. Buvilar o‘zi va umr yo‘ldoshini oilani mustahkamlash loyihasida ko‘rganidan juda xursand bo‘ladi.
Sizga kerak bo‘ladi:
- oila aʼzolarining fotosuratlari;
- karton;
- o‘lchagich, qalam;
- bo‘yoq, marker va rangli qalamlar.
Qanday yasaladi:
Asosiy vazifa — qarindoshlarning fotosuratlarini oila daraxti shoxlariga to‘g‘ri joylashtirish va ismlarni bexato yozish. Oilangiz haqida to‘plashingiz mumkin bo‘lgan barcha maʼlumotlardan foydalaning. Oila daraxtining barglari yashil bo‘lishi shart emas.
Izoh (0)