Andijon shahrining sobiq hokimi Bahrom Haydarov vafot etdi. Ushbu xabarni marhumning yaqin qarindoshlari “Daryo”ga tasdiqladi.
Bizga kelgan maʼlumotlarga ko‘ra, Bahrom Haydarovning janozasi bugun, 5-mart kuni Andijon shahridagi xonadonida bo‘lib o‘tadi.
Bahrom Haydarov viloyat Moliya boshqarmasi boshlig‘i sifatida ish yuritgan paytida sheriklari bilan 48 milliard so‘m byudjet mablag‘ini talon-toroj qilgan. Bosh prokuratura tomonidan olib borilayotgan tergov ishi doirasida 37 nafar shaxsga nisbatan ayblov e’lon qilinib, ularning 32 nafari qamoqqa olingan. Ayni kunga qadar yetkazilgan zararning 23 foizi qoplangan.
2022-yilda Bahrom Haydarovning davlat manfaatlariga 1,7 milliard so‘m zarar keltirganlikda ayblanayotgani, uning deputatlik dahlsizligini bekor qilish uchun viloyat prokuraturasiga taqdimnoma kiritilgani xabar qilingan edi. O‘sha yilning dekabr oxirlarida Bahram Haydarov Jinoyat kodeksining 167-moddasi 3-qismining “a”, “v” bandlari, 209-moddasi 2-qismi “a”, “b” bandlari va 243-moddasida nazarda tutilgan jinoyatlarni sodir etganlikda aybli deb topilib, unga Jinoyat kodeksining 59-moddasi tartibida tayinlangan jazolarni qisman qo‘shish yo‘li bilan 3 yil mansabdorlik va moddiy javobgarlik yuklatilgan lavozimlarda ishlash huquqidan mahrum qilingan holda, 10 yil ozodlikdan mahrum qilish jazosi tayinlangandi.
Maʼlum bo‘lishicha, Haydarov qamoqxonada vafot etgan. “Daryo” manbasi sobiq hokim vafoti sababini bilmasligini aytdi.
Izoh (0)