Janubiy Koreya kompaniyasi Sirdaryoda intensiv anor bog‘i va to‘rt yulduzli mehmonxona loyihasini amalga oshiradi. Bu haqda viloyat hokimi Akmaljon Maxmudaliyevning Janubiy Koreyaning Evervolution Co., Ltd kompaniyasi rahbari Jung Tayegun bilan uchrashuvida taʼkidlangan.
Viloyat hokimligi matbuot xizmatining xabariga ko‘ra, uchrashuvda hamkorlikda amalga oshirilishi ko‘zda tutilayotgan yangi investitsion loyihalar muhokama qilingan.
Xususan, kompaniya tomonidan Mirzaobod tumanida o‘zlashtirilmagan 280 gektar yer maydonda Koreya tajribasi asosida zamonaviy intensiv anor bog‘i barpo etish hamda Guliston shahri “Shodlik” mahallasida to‘rt yulduzli mehmonxona qurish loyihasi ishlab chiqilgan. Kompaniya buning uchun 10 mln dollardan ziyod sarmoya yo‘naltirishni rejalashtirmoqda.
Muzokaralar yakunida kelishuv memorandumi imzolangan. Loyihalarni amalga oshirish bo‘yicha belgilangan tartibda ish tashkil etilishiga kelishib olingan.
Bugunning o‘zida Evervolution Co., Ltd kompaniyasi taʼsischiligida Evervolution MCHJ xorijiy korxonasi viloyatimizda davlat ro‘yxatidan o‘tkazilgan.
Izoh (0)