Ijtimoiy tarmoqlarda Andijon viloyati ichki ishlar boshqarmasi patrul-post xizmatining bir guruh xodimlariga minnatdorlik bildirilgan xabarlar tarqaldi.
Maʼlum bo‘lishicha, Andijon shahar O‘zbekiston ko‘chasida yoshlar o‘rtasida boshlangan janjal Andijon viloyati ichki ishlar boshqarmasi patrul-post xizmati xodimlarining hushyorligi bois o‘z vaqtida bartaraf etilgan.
Keltirilishicha, o‘smir yigitlar janjallashib, bir kishiga ikki-uch yigit musht tushirgan. Janjal kompyuter o‘yinlaridagi jarayondan boshlangan. Andijon viloyat Ichki ishlar boshqarmasi patrul-post xizmati xodimlari buni ko‘rgach, birinchi bo‘lib kaltaklangan bolaga tibbiy yordamni ko‘rsatib, shifoxonaga olib borgan.
“Xizmat hududimizni nazorat qilib yurganimizda yo‘lning o‘ng tarafida o‘smirlar o‘zaro janjallashayotgan ekan. Qarasak, ikki kishi bir bolani urib, hushidan ketkizib qo‘ygan ekan. Sherigim darhol kaltak yegan bolaga birinchi yordam ko‘rsatishga urindi. Bolaning tili ketib qolgan bo‘lgan, behush edi. Birinchi yordam ko‘rsatishimizga qaramay, u o‘ziga kelmadi. Mashinamizda olib borib, shifokorlarga topshirdik”, — deydi inspektor.
Hozirda bolaning ahvoli yaxshi.
Izoh (0)