Butun Qozog‘iston bo‘ylab 1-mart, jumaga o‘tar kechasi UTC+5 yagona vaqti rasman o‘rnatildi. Mamlakat hukumati qaroriga ko‘ra, Ostona, Olmaota va Chimkent shaharlarida, shuningdek, Oqmo‘la, Olmaota, Jambil, Qarag‘anda, Qo‘stanay, Pavlodar, Shimoliy Qozog‘iston, Turkiston, Sh. Sharqiy Qozog‘iston, Abay, Jetisu va Ulitau viloyatlarida soat millar bir soat ortga surildi. Bu haqda DW xabar berdi.
Ilgari Qozog‘istonda ikkita vaqt zonasi, xususan, - UTC+5 va UTC+6 mavjud bo‘lgan, hududning katta qismi UTC+6 zonasida joylashgan. Soat o‘zgargandan so‘ng butun Qozog‘iston Yevropaga bir soat yaqinroq bo‘ldi.
Qozog‘istonning 2020-yildayoq yagona vaqt mintaqasiga o‘tishi tashabbuskori Olmaotada joylashgan Vasiliy Fesenkov nomidagi Astrofizika instituti bo‘lgan. Astrofiziklar o‘z takliflarini mamlakatning aksariyat qismi o‘z tabiiy vaqtiga qarab yashamasligi bilan asoslagan.
Hukumatga ko‘ra, UTC+5 ga o‘tish eng to‘g‘ri va maqbul qaror.
Qozog‘istonda yagona vaqt mintaqasini joriy etish qarori mamlakat aholisining bir qismining noroziligiga sabab bo‘ldi. Hukumatning 2000-yilda qabul qilingan “Qozog‘iston Respublikasi hududida vaqtni hisoblash tartibi to‘g‘risida”gi qarorga o‘zgartirishlar kiritish loyihasi muhokamasi statistikasi shundan dalolat beradi.
2023-yil 22-dekabrda boshlangan loyihaning uch soatlik onlayn muhokamasida Qozog‘istonning 87 nafar fuqarosi yagona vaqt mintaqasiga o‘tish uchun, 945 nafari esa qarshi ovoz bergan. Shu bilan birga, hukumat moderatorlari yana 2000 ga yaqin qozog‘istonliklarning ovozlarini ko‘rib chiqishdan bosh tortgan.
Izoh (0)