Qirg‘izistonda jasadni krematsiya qilishga ruxsat berildi

Qirg‘iziston shaharlarida davlat krematoriylarini qurish rejalashtirilmoqda. Bu haqda Jokorgu Kenesh deputati Marlen Mamataliyevga tayanib, Sputnik xabar berdi.

Deputat krematoriylar haqidagi band yaqinda qabul qilingan “Dafn etish va dafn marosimi bilan bog‘liq ish to‘g‘risida”gi qonunda borligini aytdi. Mamataliyev qonun loyihasi tashabbuskorlaridan biridir.

“Odamlar o‘lganida ularni krematsiya qilish kerak, degan fikrda bo‘lganlar bor. Yangi qonun krematoriylar qurishni nazarda tutadi. Ularda nafaqat odamlarning jasadi, balki ma’lum kasalliklarga chalingan o‘lik hayvonlar ham yoqiladi”, — deydi deputat.

Uning so‘zlariga ko‘ra, krematoriylar davlat hisobidan va faqat shaharlarda quriladi, ammo aniq soni hozircha noma’lum.

“Olti oy muddatda qo‘shimcha meʼyoriy-huquqiy aktlar qabul qilinadi. Krematsiya amaliyotining o‘zi muayyan tekshiruvdan o‘tadi. Krematoriylar ishi davlat organlari tomonidan nazorat qilinadi”, — dedi u.