Boks olamida dunyoning eng yaxshi bokschisi kim ekanligi haqida har doim bahslar bo‘lib turadi. Kimdir Muhammad Alini eng yuqori cho‘qqiga ko‘tarsa, boshqalar Jo Luis haqida iliq fikrlar bildiradi. Yana bir guruh odamlar eski va yangi davr boks olamini bir-biri bilan solishtirishning iloji yo‘q deb hisoblab, jahon tarixidagi eng yaxshi bokschi ismini alohida aytishning iloji yo‘q deb hisoblaydi.
Albatta, fikrlar turlicha bo‘lishi tabiiy. Ushbu maqolada, juda ko‘pchilik Muhammad Alidan yuqoriroq pog‘onaga qo‘yadigan Shugar Rey Robinson haqida 7 fakt taqdim etiladi.
Do‘stining nomi bilan tanilgan bokschi
Bokschi tug‘ilganida unga kichik Uolker Smit ismi berildi. Avvaliga, Smit doktor bo‘lishni xohladi, ammo to‘qqizinchi sinfni tugatgach boks bilan shug‘ullanishga qaror qildi. U 14 yoshida boks turnirida qatnashmoqchi bo‘ladi. Transport chiptasi 16 yoshdan boshlab berilishi sabab u bu ishda muammoga duch keladi.
U bunday taqiqni chetlab o‘tish yo‘lini topadi. Bunda uning do‘sti Rey Robinson yordamga keladi. Jo Luis do‘stining nomiga chipta oladi. Aynan uning ismi keyinchalik bokschining kelajakdagi ismini belgilab berdi.
Bokschi 16 yoshida uylanib, 3 yildan keyin ajrashgan
Robinson 16 yoshida uylandi. Yosh oilani farzand ham saqlab qola olmadi. Uch yil o‘tgach ular ajrashdi. Bunga bokschining ringdagi emas ko‘chadagi hayoti sabab bo‘lgan. Robinson ko‘cha bezorilar guruhiga qo‘shilib ko‘plab janjallarda qatnashgan.
Havaskor boksda misli ko‘rilmagan rekord
Reyning havaskor boksdagi faoliyati tahsinga sazovor. U 85 bor g‘alaba qozongan va janglarning 69 tasida raqibini nokautga uchratgan. Shugar ko‘pincha raqibini birinchi raunddayoq nokautga uchratgan.
Faqatgina bir bora mag‘lubiyatni qabul qilib olgan.
Jo Luiz bilan birga armiyada xizmat qilgan, ammo aqli zaifligi sabab chetlatilgan
Uch yillik professional faoliyat davomida 46 jangda qatnashgan bokschi AQSH armiyasiga chaqiriladi. Armiyada Jo Luiz bilan birga xizmat qiladi, ular ba’zida ko‘rgazmali janglar ham uyushtiradi.
O‘zining haqiqiy ismi bilan harbiy xizmat qilayotgan bokschiga turnirlarda ishtirok etish taklifi beriladi. Ammo bokschi ushbu turnirlarni tomosha qilish afroamerikaliklarga taqiqlanganidan xabar topib, turnirlarda ishtirok etishdan bosh tortadi. Aynan mana shu sabab, doktorlar unga “aqli zaif” tashxisini qo‘yadi va 1944-yilning iyunida bokschini demobilizatsiya qilishadi.
Tushi o‘ngidan kelgan va raqibini ringda o‘ldirib qo‘yadi
Yarim o‘rta vazn toifasida jang qiluvchi Shugarga jahon chempionligi unvonining birinchi himoyasi juda og‘ir kechadi. 1947-yildagi jangda u juda katta ruhiy zarba oladi. Jimmi Doyl bilan jangdan bir necha kun oldin Shugar Rey Robinson tush ko‘radi va tushida raqibini o‘ldirib qo‘yadi. Tushi sabab u jangda ishtirok etishni xohlamaydi. Ruhoniylar va vazir yordamida Robinson jangga rozi qilinadi.
Natijada Shugar Doylni “xuk” zarbasi bilan nokautga uchratadi. Bokschi bir necha soat o‘tib shifoxonada vafot etadi. Shu jangdan so‘ng Robinson raqiblarini o‘ldirib qo‘yishdan hayiqib bor kuchi bilan zarba bera olmay qoladi.
E’tiborlisi, bokschi aynan shu jang va bundan tashqari bir nechta jangdan tushgan foydalarni Doylning oilasiga hadya qiladi.
Birgina jangda muddatidan oldin mag‘lub bo‘lgan
Rey Robinson faqatgina bir zarbadan keyin qayta tura olmagan. To‘g‘ri, ushbu janggacha bokschi mag‘lubiyatga uchragan, lekin janglarni oxiriga yetkiza olgan. Joi Maksim bilan bo‘lgan jangda Robinson nokautga uchradi va sportchi jahon chempionligi kamarini himoya qila olmadi.
Qashshoqlikdagi hayot
Boksdagi faoliyatini tugatgach Rey Robinson hech vaqosiz qolib ketdi. U 4 million dollardan ortiq pullarni bokschilik faoliyati davomida sarflab yuborishga ulgurgan edi. O‘z faoliyatini tugatganidan bir oy o‘tib, uning sharafiga “Shugar Rey Robinson kechasi” o‘tkazildi va unga juda yirik sovrin taqdim etildi.
Ammo Reyning so‘zlariga qaraganda, uning Manxettendagi uyida ushbu mukofotni joylashga biror mebeli bo‘lmagan. Qarigan chog‘ida unga Alsgeymer tashxisi qo‘yiladi.
Bokschi 67 yoshida vafot etadi.
Robinson professional boksda 200 jang o‘tkazdi, shundan 173 tasida g‘alaba qozondi. G‘alabalarning 108 tasida raqiblarini nokautga uchratgan. 19 ta uchrashuvda raqiblariga mag‘lub bo‘lgan. 6 uchrashuvda durang qayd etgan bokschining ikki janggi o‘tkazilmagan deb hisoblangan.
The Ring jurnali 2002-yilda Shugarni jahonning eng yaxshi bokschisi deb yozadi.
Muhammad Ali ham o‘zining ba’zi jang uslublarini Reydan olgani haqida aytib o‘tadi. “U — qirol, master, mening idealim”, — degan edi boks afsonasi.
Izoh (0)