Termiz shahridagi “Surxondaryoyo‘lko‘kalam” unitar korxonasi soliq va boshqa yuridik tashkilotlardan 1 mlrd 278 mln so‘m qarzdor bo‘lib qolgan. Bu haqda O‘zA xabar bermoqda.
Maʼlum qilinishicha, qarzdor korxonaga tegishli sud hujjatlari MIB Termiz shahar bo‘limi ish yurituviga qabul qilingach, ijro harakatlari boshlanib, yettita avtotransport vositasi xatlovga olingan.
“Bu jarayonda korxonaga tegishli “Lada” rusumli avtomashina Termiz shahridan topilgach, xatlovga olish paytida haydovchi davlat ijrochilarining qonuniy talabiga bo‘ysunmasdan qo‘pol qonunbuzilish holatini sodir etib, voqea joyidan ketib qoladi. Olib borilgan tezkor qidiruv tadbirlari chog‘ida avtomashina topilib, jarima maydonchasiga joylashtirildi. Huquqbuzarga nisbatan maʼmuriy bayonnoma rasmiylashtirildi”, – deyiladi xabarda.
Surxondaryo viloyat boshqarmasi masʼul xodimi Ulug‘bek Haydarovning taʼkidlashicha, ichki ishlar va boshqa davlat organlari hamkorligida tashkil etgan reyd tadbirlarda qidiruvda bo‘lgan 300 dan ortiq avtomashina hamda aliment to‘lashdan bo‘yin tovlab, qochib yurgan 55 nafar qarzdor topilgan.
Jumladan, Bandixon tumanida yashaydigan alimentchi qarzdor ota ham ana shunday qidiruv tadbirlaridan birida qo‘lga tushgan. U turmush o‘rtog‘i bilan ajrashgach, ishlash maqsadida chet elga chiqib, yaqinlariga pul jo‘natib turgan bo‘lsa-da, lekin aliment to‘lamay kelgan.
Qarzdor otaga nisbatan to‘plangan hujjatlar Jinoyat ishlari bo‘yicha Bandixon tuman sudida ko‘rib chiqilib, qariyb 9 mln so‘m aliment qarzdorligini to‘lamagani uchun unga 15 sutka maʼmuriy qamoq jazosi tayinlangan.
Izoh (0)