“Qarshi mintaqaviy temir yo‘l uzeli”ning qariyb 5,5 mlrd so‘m qarzdorligi evaziga Trailblazer va MAN xatlandi, deb xabar bermoqda MIB axborot xizmati “Daryo”ga.
Maʼlum qilinishicha, Majburiy ijro byurosi Qarshi shahar bo‘limi ish yurituvida qarzdor “Qarshi mintaqaviy temir yo‘l uzeli”dan 1 milliard 729 million so‘m, 19-fevraldagi qaroriga asosan 3 milliard 688 million so‘m, jami 5 milliard 417 million so‘m soliq qarzini undirish to‘g‘risidagi ijro hujjati mavjud.
Bo‘lim davlat ijrochisi tomonidan ushbu hujjatning ijrosini taʼminlash maqsadida “Qarshi mintaqaviy temir yo‘l uzeli”ning rahbari va bosh hisobchisi bir necha marotaba mavjud soliq qarzdorligini to‘lab berishi to‘g‘risida yozma va og‘zaki ravishda ogohlantirilgan bo‘lsa-da, shu kunga qadar turli bahonalar bilan qarz to‘lanmasdan kelgan.
Shu sababli davlat ijrochilari tomonidan joriy yilning 26-fevral kuni qarzdor “Qarshi mintaqaviy temir yo‘l uzeli”ga tegishli bo‘lgan Trailblazer va MAN rusumli avtotransport vositalari xatlanib, jarima maydonchasiga joylashtirilgan. Shuningdek, avtotransport vositalarini xatlash jarayonida, qarzdor korxona vakillari davlat ijrochilariga nisbatan to‘sqinlik qilishga uringan.
Hozirda ijro hujjatining ijro etilishiga to‘sqinlik qilish yoki davlat ijrochisiga turli shaklda qonunga xilof ravishda taʼsir o‘tkazish holati yuzasidan o‘rganishlar olib borilmoqda.
Izoh (0)