Germaniya harbiy-dengiz kuchlarining Hessen fregati 27-fevral, seshanba kuni Yamandagi husiylar bilan ilk to‘qnashuvida ikkita havo nishonini muvaffaqiyatli urib tushirdi va ularning Qizil dengizdagi kemalarga hujumini qaytardi, deya axborot manbalariga tayanib, Deutsche Welle xabar berdi.
24-fevral kuni Germaniya Bundestagi Bundesverga savdo kemalarini husiylar hujumidan himoya qilish uchun Yevropa Ittifoqining Aspides missiyasida ishtirok etish mandatini taqdim etgan edi. Bortida 240 askar bo‘lgan Hessen fregati rasmiy mandat berilganidan so‘ng darhol ishga kirishgan.
Germaniya mudofaa vaziri Boris Pistoriusning ta’kidlashicha, bu missiya Bundesver uchun o‘n yilliklardagi eng xavfli missiyalardan biri bo‘ladi.
“Biroq bu dengizda harakatlanish erkinligini ta’minlash uchun zarur va mintaqa barqarorligiga hissa qo‘shadi”, — deya qo‘shimcha qilgan siyosatchi.
O‘z navbatida, Germaniya harbiy-dengiz kuchlari raketalar, dronlar va kamikadze-qayiqlari hujumlarini qaytarishga tayyorlanayotganini ma’lum qilgan.
Izoh (0)