DXX tomonidan O‘zbekistonning uch hududida yerning noqonuniy sotilishi oldi olindi.
Maʼlum qilinishicha, Samarqand viloyatining Nurobod tumanidagi qishloq xo‘jaligi mahsulotlari yetishtirishga ixtisoslashgan fermer xo‘jaligi rahbari va hisobchisi o‘zaro til biriktirib, mazkur xo‘jalikka 49 yil muddatga ijaraga berilgan 3 gektar yer maydonini xaridorga 70 ming AQSH dollariga sotishga kelishgan. Ular oldindan 35 ming AQSH dollari olgan vaqtida Davlat xavfsizlik xizmati, Bosh prokuratura huzuridagi departament hamda ichki ishlar organlari xodimlari tomonidan ushlandi.
Bu yo‘nalishda Davlat xavfsizlik xizmatining Qashqadaryo viloyati bo‘yicha boshqarmasi xodimlari ham boshqa huquq-tartibot idoralari bilan hamkorlikda tezkor tadbirlar o‘tkazdi. Jumladan, Qashqadaryo viloyatining Qamashi tumanidagi chorvachilikka ixtisoslashgan fermer xo‘jaligi rahbari mazkur tumandagi klasterga tegishli 66,32 gektar yaylov yerlaridan ikkilamchi ijara shartnomasi asosida foydalanib kelayotgan bo‘lsa-da, ushbu shartnomani bekor qilgan va klaster rahbarlari orqali 57 gektar yaylovni xaridor nomiga ijara asosida rasmiylashtirib berish evaziga 500 million so‘m talab qilgan. Ammo u so‘ralgan pul mablag‘i hisobidan 20 ming AQSH dollari va 100 mln so‘m olgan vaqtida ashyoviy dalillar bilan ushlandi.
Boshqa holatda esa Shahrisabz tumanidagi agrofirma rahbari tuman hokimligi zaxirasida bo‘lgan 50 gektar sug‘oriladigan yer maydonini mansabdor tanishlari orqali xaridorga 1 yil muddatga, tegishli hujjatlarsiz foydalanish uchun olib berish evaziga 500 million so‘m talab qilib, oldindan 150 million so‘m olgan vaqtida ushlandi.
Shuningdek, tergovga qadar tekshiruv davomida, u mazkur pul mablag‘ining bir qismini o‘zining jinoiy sherigi bo‘lgan, paxta-g‘alla yetishtirishga ixtisoslashgan fermer xo‘jalik rahbariga berishi kerakligi aniqlanib, ushbu shaxs ham 20 million so‘m olgan vaqtida ushlandi. Agrofirma rahbari ham, klaster rahbari ham muqaddam sudlangani qayd etilgan.
Surxondaryo viloyatining Qiziriq tumanida yashovchi, 1975-yilda tug‘ilgan fuqaro o‘zining turmush o‘rtog‘iga tuman hokimining 2010-yildagi qarori asosida dehqon xo‘jaligi tashkil etish uchun 49 yil muddatga ijaraga berilgan 30 sotix yer maydonini go‘yoki 40 sotix deb aytib, xaridorga 280 million so‘mga sotishga kelishadi. Ammo Davlat xavfsizlik xizmati va Bosh prokuratura huzuridagi departament hamda ichki ishlar organlari xodimlari hamkorligida o‘tkazilgan tezkor tadbirda, u so‘ralgan pul mablag‘ini olgan vaqtida ashyoviy dallillar bilan ushlandi.
Hozirda mazkur shaxslarning barchasiga nisbatan jinoyat ishlari qo‘zg‘atilgan.
Izoh (0)