Sobiq sog‘liqni saqlash vaziri Amrillo Inoyatov 2023-yilning yanvar oyida 2023-yildan boshlab, davlat tibbiy sug‘urta tizimini Toshkent shahrida joriy qilish uchun barcha imkoniyatlar mavjudligini, bundan tashqari vazirlik o‘ziga majburiyat olgan holda Navoiy viloyatida ham tibbiy sug‘urtani yo‘lga qo‘yilishini ma’lum qilgan edi.
Buning uchun:
- bir oy muddatda tibbiy sug‘urta tizimini joriy etish bo‘yicha qaror ishlab chiqilishi;
- Toshkent shahridagi 72 ta poliklinika va 40 ta shifoxonani kompyuter jihozlari, zarur tibbiy uskunalar bilan ta’minlashga 30 milliard so‘m yo‘naltirilishi;
- poytaxtda 2023-yil 1-iyuldan tibbiy sug‘urta tizimi mexanizmlari joriy etilishi aytilgandi.
Oradan bir yil vaqt o‘tgan bo‘lsa-da, yuqorida aytilgan ikki hududda ham davlat tibbiy sug‘urta tizimiga to‘liq o‘tilganicha yo‘q. Mazkur holatni o‘rganish maqsadida “Daryo” muxbiri mas’ullar bilan bog‘landi.
Davlat tibbiy sug‘urta jamg‘armasi axborot xizmati taqdim etgan ma’lumotga ko‘ra, davlat tibbiy sug‘urta tizimi Navoiy viloyatida hali joriy etilmagan bo‘lib, u yerda tayyorgarlik ishlari olib borilmoqda.
Jamg‘armaning Toshkent shahar hududiy bo‘linmasi bo‘lim boshlig‘i O‘ral Safarovning aytishicha, davlat tibbiy sug‘urta tizimi poytaxtda 2024-yilning yanvar oyidan joriy etila boshlagan.
Tizimning kechikishiga moddiy texnik bazaning yetishmasligi, raqamlashtirish va xodimlarning malakasi bilan bog‘liq. Hozirda poliklinikalardagi 90 foizdan ortiq xodimlar tizim bilan ishlashni o‘zlashtirdi.
Poytaxtda 2024-yilning oxiriga qadar to‘liq sug‘urta tizimiga o‘tiladi. Mamlakat bo‘ylab 2026-yilga qadar o‘tish belgilangan. Agar tizim butun hududlarda yo‘lga qo‘yilmasa, ishlashi qiyin kechadi. Sababi fuqarolarning ko‘chishi va shunga o‘xshash omillar tizimning ishlashiga ta’sir qiladi.
Hozirda barcha viloyatlarda raqamlashtirish ishlari olib borilmoqda. Bundan tashqari tibbiyot muassasalarning texnik bazasi tegishliligiga qarab Sog‘liqni saqlash vazirligi va hokimliklar bilan hamkorlikda to‘ldirib borilmoqda, — dedi O‘ral Safarov.
Uning qo‘shimcha qilishicha, kelgusida nafaqat davlat tibbiyot muassasalari balki, Davlat tibbiy sug‘urta jamg‘armasi bilan shartnoma tuzgan nodavlat tibbiyot muassasalariga murojaat qilib, davolangan shaxslarning sug‘urta pullari qoplab berilishi ko‘zda tutilgan.
Izoh (0)