O‘zbekistonda 26-fevral kuni elektr stansiyalar orqali 244,6 million kVt·soat, rejadagiga nisbatan 5 foiz ko‘p elektr energiyasi ishlab chiqarildi. Bu haqda Energetika vazirligi matbuot xizmati xabar berdi.
Qayd etilishicha, buning uchun issiqlik elektr stansiyalarida 43,3 million kubometr tabiiy gaz, 20,7 ming tonna ko‘mir hamda 11,3 ming tonna mazut yoqilgan. Turkmanistondan 22,2 million kVt·soat elektr energiyasi import qilingan.
Qishning sovuq kunlarida magistral gaz quvurlarida gaz bosimining keskin tushib ketgani hamda aholi isteʼmolchilarida elektr energiyasiga nisbatan talabning oshib borishi tufayli 26-fevral kuni ham mamlakat bo‘ylab asosan kunning tig‘iz vaqtlarida 600 MVtgacha cheklovlar kiritilishiga majbur bo‘lingan.
“Mavjud vaziyatdan kelib chiqib, holat yaxshi tomonga o‘zgargunga qadar bugun ham kunning tig‘iz paytlarida maʼlum miqdorda cheklovlar kiritilishi mumkin”, — deyiladi xabarda.
Gaz bosimining odatdagidan ko‘ra past ekaniga qaramay, 26-fevral kuni ham uning isteʼmoli yuqoriligicha qolgan. Kecha mazkur miqdor 156,5 million kubometrni tashkil qilgan.
“Tabiiy gaz bosimining hali-hanuz past ekanligi bu boradagi meʼyoriy sxemaning to‘liq tiklanishiga to‘sqinlik qilmoqda”, — deya ta’kidlanadi Energetika vazirligi xabarida.
O‘zbekistonga kelib chiqishi arktik bo‘lgan sovuq va nam havo massalari kirib kelishi 16-fevraldan boshlangandi. Respublikada havo sovishi ortidan metan zapravkalar ish jadvaliga o‘zgartirishlar kiritilishi mumkinligi haqida “Hududgaztaʼminot” matbuot xizmati avvalroq ma’lum qilgandi.
Izoh (0)