O‘zbekistonda yoshlar o‘rtasida tadbirkorlikni keng ommalashtirish va biznes bilan shug‘ullanishga qo‘shimcha imkoniyatlar yaratiladi. Bu haqda “O‘zbekiston–2030” strategiyasini 2024-yilda amalga oshirishga qaratilgan davlat dasturi to‘g‘risidagi prezident farmonida belgilandi.
Unga ko‘ra, oilaviy tadbirkorlik dasturi doirasida ajratilayotgan kreditlarning kamida 40 foizi yoshlar tadbirkorligini rivojlantirishga yo‘naltiriladi.
2024-yil 1-iyundan boshlab “Yosh tadbirkor” tanlovlarini o‘tkazish amaliyoti yo‘lga qo‘yiladi.
Bunda Yoshlar ishlari agentligi tomonidan tanlov asosida mahalla—tuman—viloyat—respublika bosqichlarida yoshlarning istiqbolli biznes loyiha va g‘oyalari saralanadi. Nogironligi bo‘lgan yosh tadbirkorlarning loyiha va g‘oyalariga alohida e’tibor qaratiladi.
Respublika bosqichida saralashdan o‘tgan har bir loyihaga BHMning ming baravarigacha (340 million so‘mgacha) miqdordagi imtiyozli kreditlar ajratiladi.
G‘olib bo‘lgan biznes loyiha va g‘oyalar egalari Yosh tadbirkorlarni qo‘llab-quvvatlash jamg‘armasi hisobidan xorijiy davlatlarga malaka oshirishga yuboriladi.
Izoh (0)