O‘zbekistonda eng kamida 68 nafar bolaning o‘limi, 16 nafar bolaning nogiron bo‘lib qolishiga sababchi bo‘lgan “Dok-1 Maks” ishi bo‘yicha sud hukmi e’lon qilingandi. Shundan so‘ng mazkur jinoyat ishini ko‘rib chiqqan sudlov hay’ati raisi — sudya Muso Yusupov ishtirokida matbuot anjumani tashkil etildi. Bu haqda “Daryo” jurnalisti xabar berdi.
Matbuot anjumanida so‘z olgan “Daryo” jurnalisti sudya Muso Yusupovga yuzlanib, “siropdan zaharlanib vafot etgan, ammo rasmiylar ro‘yxatidan tushib qolgan 69-qurbon hamda dori sabab nogiron bo‘lib qolgan yana bir bola masalasi ochiq qoladimi”, deb so‘radi.
Bizda hozir ko‘rib chiqilgan jinoyat ishidan tashqari jinoyat ishi ham mavjud, ya’ni aynan Samarqand viloyati sog‘liqni saqlash boshqarmasi boshlig‘iga nisbatan jinoyat ishi qo‘zg‘atilib, hozirda qamoq ehtiyot chorasi qo‘llanilgan. Tergov jarayonida, aynan shu tergov jarayoniga boshqa shaxslar ham ayblanuvchi sifatida jalb qilingan. Shu bilan birgalikda siz aytgan ikkita holat, undan tashqari ham fuqarolar murojaat qilmoqda. Bugungi kunda dastlabki sud jarayonini kuzatgan insonlardan yangi murojaatlar kelmoqda. Ular “bizda ham shunday holat bo‘lgan”, deb murojaat qilishmoqda. Bugun hukm o‘qildi, endi yana murojaatlar ko‘payadi. Shu sabab tergovda alohida jinoyat ishi ajratilgan, — deydi “Dok-1 Maks” ishini ko‘rib chiqqan sudya Muso Yusupov.
Sudyaning bildirishicha, mazkur masala yuzasidan sudga Sirdaryo va Jizzax viloyatlaridan murojaatlar kelib tushgan.
Biz ushbu murojaatlarni tergov organiga yuborganmiz. Tergov organi birinchi instansiyada sudlanayotgan shaxslarning ayrimlariga qamoq ehtiyot chorasini qo‘llagan. O‘sha holat bo‘yicha alohida jinoyat ishida tergov harakatlari davom ettirilyapti. Mazkur holatda yana jabrlanuvchilar bo‘lsa, ular eshitilib, tergov ishiga qo‘shiladi, — deydi sudya.
Muso Yusupovning qo‘shimcha qilishicha, yuqorida tilga olingan jabrlanuvchilar murojaati dastlabki sud jarayoniga qo‘shilganida “Dok-1 Maks” sudi yana cho‘zilar edi.
Xabaringiz bor, “Dok-1 Maks” sudida ikki marta jinoyat ishi yangidan boshlandi. Jinoyat ishi yangidan boshlangach, yana sudning boshiga qaytib, sudlov ochilib, ayblov xulosasi o‘qib eshittiriladi. Har bitta yangi ayblov kelgach, sudga qo‘shaversak, biz sudni har safar boshidan boshlashimizga to‘g‘ri kelar edi. Bu olti oy davom etgan sudimizning yana cho‘zilishiga olib kelardi. Qo‘shimcha jinoyat ishi yaqin kunlarda sudga chiqadi, — deydi u.
Eslatib o‘tamiz, “Dok-1 Maks” ishi yakuniga ko‘ra, hindistonlik ishlab chiqaruvchining O‘zbekistondagi rasmiy vakili S.R.P. 20 yilga, Farmatsevtika tarmoqlarini rivojlantirish agentligining sobiq rahbari Sardor Kariyev 18 yilga, uning o‘rinbosarlari — Amirxon Azimov va Nodirbek Musayevlar 16 yil muddatga ozodlikdan mahrum qilindi.
Izoh (0)