Misrdan gepatit C ga qarshi dori vositalarining 2024-yildagi oltinchi partiyasi O‘zbekistonga yetib keldi. Bu haqda “Dunyo” AA xabar berdi.
25-fevral kuni olib kelingan 12 qutidagi 6720 dona “Sofosbuvir-400” dori vositalari Sog‘liqni saqlash vazirligi huzuridagi Virusologiya ilmiy-tekshirish instituti tomonidan bemorlarga taqsimlanadi.
Misr hukumati tomonidan 2025-yilga qadar umumiy qiymati 4,2 million dollar bo‘lgan jami 800 ming dona С gepatitiga qarshi “Daklatasvir” va “Sofosbuvir”, B gepatitiga qarshi “Entekavir” dori vositalarining beg‘araz yordam sifatida berilishi bo‘yicha kelishuvga erishilgan. 2023-yil davomida umumiy qiymati 696 ming dollarga teng bo‘lgan mazkur dori vositalari O‘zbekistonga bosqichma-bosqich yuborilgandi.
Mutaxassislar hisob-kitobiga ko‘ra, bir nafar bemorning 3 oylik to‘liq davolash kursi uchun 3 qadoq “Daklatasvir” va 3 qadoq “Sofosbuvir” kerak bo‘ladi. Mazkur davolash kursining Misrdagi o‘rtacha narxi 31 dollar bo‘lsa, O‘zbekistonda joriy yilga qadar 100 dollarga baholanib kelingan.
Misr hukumati taqdim etadigan 800 ming dona dori vositasi jami 133 ming bemorga yetadi. Ya’ni, agarda gepatit C ga qarshi dori vositalari shu paytgacha xorijdan xarid qilinayotgan baholarda sotib olinganda O‘zbekiston davlat byudjetidan 13,3 million dollar sarflangan bo‘lardi. Davlat byudjetidan iqtisod qilingan mablag‘lar gepatitni aniqlash bo‘yicha aholini skrining qilish hajmini joriy 10 mingdan 1 millionga qadar oshirish, viruslarni aniqlab, kasallikka to‘liq barham berishga imkon yaratishi kutilmoqda.
Izoh (0)