Surxondaryo viloyatining Boysun tumanida jami 24,4 km avtomobil yo‘liga asfalt-beton yotqiziladi. Bu haqda viloyat hokimligi matbuot xizmati xabar berdi.
Maʼlum qilinishicha, har ikki yilda bir marta o‘tkaziladigan “Boysun bahori” xalqaro festivali bu yil Boysun tumani “Bibishirin” mahallasidagi turizm kompleksida o‘tkaziladi. Shu munosabat bilan bugun, 25-fevral kuni Surxondaryo viloyati hokimi Ulug‘bek Qosimov tumanda bo‘lib, xalqaro festivalga tayyorgarlik ko‘rish bo‘yicha belgilab berilgan vazifalar ijrosi, qurilish-taʼmirlash ishlarining borishi bilan tanishgan.
Shuningdek, tuman markazidagi 10 ta mahallada infratuzilmani yaxshilash ishlari ko‘zdan kechirilgan. Xususan, festivalga keluvchilar uchun qulay sharoitlar yaratish, tuman markazidagi 3 km avtomobil yo‘liga asfalt yotqizish, piyodalar uchun qulayliklar yaratish, suv yo‘li ariqlari va mavjud savdo do‘konlarini taʼmirlash, xizmat ko‘rsatish, mehmonxona, umumiy ovqatlanish nuqtalari tashkil etish va avtoturargoh qurilishi amalga oshirilmoqda.
Shuningdek, tuman markazi va unga yondosh 10 ta mahalladagi 24,4 km asosiy avtomobil yo‘llarida asfalt-beton qoplamasi yotqizish uchun tayyorgarlik ko‘rilmoqda.
Viloyat hokimi mutasaddilar bilan “Gaza” mahallasida bo‘lib, u yerda yangi maktab qurilishi uchun joy tanlangan.
Izoh (0)