Qozog‘istonga Starlink uskunasining dastlabki 500 ta to‘plami yetib keldi. Bu haqda respublika raqamli rivojlanish, innovatsiyalar va aerokosmik sanoat vaziri Bagdat Musin xabar berdi.
Vazirning so‘zlariga ko‘ra, jami ikki mingta sun‘iy yo‘ldosh tizimi keladi, u qishloqlardagi 2000 ta maktabni yuqori tezlikdagi internet bilan ta’minlaydi.
“Uskunalarni qabul qilish jarayonini shaxsan tekshirish uchun Olmaotaga keldim. Kelgusi haftada Turkiston va Oqmo‘la viloyatlaridagi Starlink tizimini o‘rnatishga to‘liq tayyor bo‘lgan maktablarga yetkazib berish boshlanadi”, — deydi Bagdat Musin.
U qolgan hududlarga 10 kundan keyin Starlink uskunasining keyingi partiyasi yetib kelishini aytdi.
“20 kun ichida 2000 ta komplekt yetib keladi, bu esa mamlakatimizdagi 2000 ta olis qishloq maktablarini yuqori tezlikdagi internet bilan taʼminlaydi”, — dedi u.
6-fevralda Bagdat Musin Qozog‘istonda Starlink dan foydalanish rejalari haqidagi savolga izoh berdi. Uning aytishicha, Qozog‘iston, albatta, yangi texnologiyalarga to‘siq bo‘lmaydi. Qozog‘istonliklar allaqachon SpaceX kompaniyasining Starlink terminallarini o‘rnatishga kirishgan. Ammo hozircha ushbu internet aloqasidan shaxsiy maqsadlarda foydalanish noqonuniy hisoblanadi.
2023-yil noyabr oyida Bagdat Musin vazirlik Qozog‘iston fuqarolarining xorijiy sun’iy yo‘ldosh tizimlaridan foydalanishi bo‘yicha qator tuzatishlar kiritishni rejalashtirayotganini aytgandi.
Izoh (0)