Farg‘ona viloyatida to‘yi kuni qochib ketgan yigitga sud hukmi o‘qilib, u olti yilga qamaldi. Bu haqda O‘zA xabar berdi.
Jinoyat ishlari bo‘yicha Quva tumani sudida mazkur ish ko‘rib chiqilgan. Ish tafsilotlariga ko‘ra, farg‘onalik D.S. reklama sababli TV kanal raqamiga qo‘ng‘iroq qilib, texnika jihoziga buyurtma beradi. Oradan bir necha kun o‘tib unga notanish raqamdan qo‘ng‘iroq bo‘ladi. Notanish yigit o‘zini “Hop-Shop” TV kanalida ishlashini, uning buyurtmasi bo‘yicha ayrim masalalarni aniqlab olishi kerakligini aytadi va qizning o‘qishni tamomlab ishlayotgani, turmushga chiqmagani, oilasi va boshqa ma’lumotlarni batafsil so‘rab oladi.
Shundan so‘ng K.Sh. Toshkentdan Marg‘ilon shahriga keladi. Qiz bora-bora yigitning barcha talablarini hech shubhalanmay bajargan. Jumladan, K.Sh. unga uylanishi uchun uyini ta’mirlashga deb pul so‘raganda to‘plab yurgan barcha pullarini bergan. Yigit qizda unga berish uchun puli qolmagach, kredit do‘konlaridan va tijorat banklaridan pul hamda turli tovarlar olib berishni iltimos qilgan. Ular nikoh o‘qitgach, yigit qizning uyida yashashni boshlagan.
K.Sh. Farg‘ona shahridagi to‘yxonada dabdabali to‘y qilishini, Toshkentdan kazo-kazolar mehmonga kelishini aytib qiz va uning yaqinlarini ishontirgan va to‘y kunini belgilagan. To‘yxona manzili ko‘rsatilgan soxta taklifnomalarni D.S.ning yaqinlariga tarqatib, hammani to‘yga taklif qilgan. Shundan so‘ng K.Sh. kelin va uning yaqinlarini to‘plab ularga qimmatbaho to‘yxonada katta to‘y qilish uchun ancha qarz bo‘lib qolganini, o‘ziga yana biroz yordam kerakligini aytib ularni ishontirgan. Barchaning to‘yona pullarini yig‘ishtirib olib Toshkent viloyatiga qochib ketgan.
Sudda ham K.Sh. o‘zi yetkazgan zararlarni qoplash o‘rniga, jabrlanuvchi D.S.ni yana aldashga urindi. Oilasidan ajrashib unga uylanishini aytib, faqat zararlarning qoplangani haqida ariza yozib uni qamoqdan qutqarib qolishni iltimos qilgan. Sud hukmi bilan firibgar K.Shuhratovga 6 yil ozodlikdan mahrum qilish jazosi tayinlandi.
Izoh (0)