Shavkat Mirziyoyev nomiga turkman xalqining milliy yetakchisi, Turkmaniston Xalq maslahati raisi Gurbanguli Berdimuhamedovdan maktub keldi. Bu haqda prezident matbuot kotibi xabar berdi.
Maktubda O‘zbekistonda o‘zbek va turkman xalqlari o‘rtasidagi birodarlik va do‘stlik poydevorini yaratishga ulkan hissa qo‘shgan buyuk turkman shoiri va mutafakkiri Maxtumquli Firog‘iyning 300 yilligini keng nishonlash to‘g‘risida qabul qilingan qaror uchun davlat rahbariga chuqur minnatdorlik bildirilgan.
“O‘zbekistonda Maxtumquli Firog‘iyning 300 yillik yubileyi keng nishonlanishi xalqlarimiz va davlatlarimiz o‘rtasidagi birodarlik rishtalarining buzilmasligi, tarixiy taqdirlari mushtarakligi, yakdilligimiz va hamisha birga bo‘lishga tayyorligimizning navbatdagi tasdig‘i bo‘lishiga ishonch bildirilgan”, — deyiladi xabarda.
Gurbanguli Berdimuhamedov O‘zbekiston prezidentiga mustahkam sog‘liq, farovonlik, faoliyatida yangi muvaffaqiyatlar, O‘zbekiston xalqiga esa tinchlik va ravnaq tilaklarini izhor etgan.
Bir necha kun oldin Shavkat Mirziyoyev “Buyuk turkman shoiri va mutafakkiri Maxtumquli Firog‘iy tavalludining 300 yilligini keng nishonlash to‘g‘risida”gi qarorga imzo chekkandi. Qarorga ko‘ra, Maxtumquli Firog‘iyning “Tanlangan asarlar”i hamda uning hayoti va ijodiy faoliyatiga bag‘ishlangan ilmiy maqolalar to‘plami nashrga tayyorlanadi va chop etiladi. Shuningdek, davlat buyurtmasi asosida O‘zbekiston va Turkmaniston kino ustalari hamkorligida Maxtumquli Firog‘iyga bag‘ishlangan badiiy film yaratiladi.
Izoh (0)