Toshkent viloyati hududida tabiiy gazdan noqonuniy foydalanish holatlari fosh etildi, deb xabar beradi Bosh prokuratura huzuridagi departament.
Qayd etilishicha, departamentning Qibray tuman bo‘limi tomonidan “Qibraytumangaz” filiali xodimlari bilan hamkorlikda tezkor tadbir o‘tkazilgan. Tadbirda “F.F.” MCHJ rahbari Z.G‘. va boshqalar MCHJning qum quritish sexida gaz tarmog‘idan tamg‘alash yo‘li bilan uzilgan bo‘lsa-da, o‘zboshimchalik bilan tijorat maqsadida tarmoqqa qayta ulanib, yuqori quvvatdagi sertifikatlanmagan gaz yondirgichdan foydalangan holda 553,4 million so‘mlik tabiiy gazni noqonuniy sarflagani aniqlangan.
Shu kabi, departamentning Quyi Chirchiq tuman bo‘limi tomonidan “Quyi Chirchiqtumangaz” GTF xodimlari bilan hamkorlikda o‘tkazilgan tekshiruvda “Sirg‘ali” MFYda yashovchi A.O. o‘z uyining 24 sotix yer maydonida issiqxona tashkil etib, ushbu issiqxonani hech qanday hujjatsiz tijorat maqsadida umumiy foydalanishdagi gaz tarmog‘iga o‘g‘rilik yo‘li bilan ulab, jami 149,8 million so‘mlik tabiiy gazdan noqonuniy foydalanganligi aniqlangan.
Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Samarqandda noqonuniy oltin qazuvchilar 753 mln so‘mlik elektr energiyasini o‘g‘irlagani ma’lum bo‘lgani, Asakada elektr tarmoqlari muhandisi 13 mln so‘mni firibgarlik yo‘li bilan qo‘lga kiritgani to‘g‘risida xabar berilgandi.
Izoh (0)