Farg‘ona viloyati bojxona boshqarmasi “O‘zbekiston” chegara bojxona postida noqonuniy pnevmatik qurol aylanmasiga chek qo‘yildi. Bu haqda viloyat bojxona boshqarmasi xabar berdi.
Qayd etilishicha, bojxona xodimlari DXX Chegara qo‘shinlari xodimlari bilan hamkorlikda qo‘shni davlatdan post orqali harakatlangan fuqaro boshqaruvidagi Tico rusumli transport vositasini nazoratdan o‘tkazgan. Tekshiruv davomida bojxona nazoratidan yashirilgan hamda tegishli ruxsatnomalari bo‘lmagan 1 dona 4,5 kalibrli pnevmatik qurol, shuningdek, 4 dona qurol uchun gaz ballonlar va 186 dona o‘qlar borligi aniqlangan.
“Qurol to‘g‘risida”gi qonunining 15-moddasiga muvofiq har qanday fuqaroviy va xizmat qurolini hamda uning o‘q-dorilarini O‘zbekiston hududiga olib kirish va olib chiqish ichki ishlar organlari tomonidan taqdim etilgan ruxsatnomalar asosida amalga oshiriladi.
Mazkur holat yuzasidan bojxona organlari tomonidan tergovga qadar tekshiruv harakatlari olib borilmoqda.
Avvalroq “Yallama” chegara bojxona post xodimlari tomonidan O‘zbekistonda faoliyat olib borayotgan masʼuliyati cheklangan jamiyatlardan birining nomiga kuryerlik jo‘natmalari bojxona nazoratidan o‘tkazilganida uning ichidan pnevmatik to‘pponcha chiqqani to‘g‘risida xabar berilgandi.
Izoh (0)