“Qashqadaryoda bir yilda bitta rayon paydo bo‘lmoqda”. Murodjon Azimov viloyatdagi tug‘ilishlar soniga aniqlik kiritdi

Qashqadaryo viloyati hokimi Murodjon Azimov har yili viloyatda 100 ming nafardan ortiq tug‘ilishlar bo‘layotganini, 2023-yildagi tug‘ilishlar soniga e’tibor qaratilsa, hududda bir yilda bitta tuman paydo bo‘layotganini aytdi. Bu haqda “Daryo”ga viloyat hokimligi axborot xizmati rahbari Ahror Sodiqov xabar berdi.

Bildirilishicha, bu haqda hokim viloyat yoshlari bilan uchrashuv chog‘ida gapirgan. 

Har yili, masalan 2023-yilni aytyapman 102 ming 386 nafar odam tug‘ildi. Muborak tumanining aholisi 92 ming nafar, Muborak tumani aholisidan 10 ming nafar ko‘p tug‘ilish. Bu degani Qashqadaryoda bitta rayon paydo bo‘lyapti. Tasavvur qiling, besh yildan keyin ularga maktab kerakmi? Bog‘cha kerakmi? Xudo ko‘rsatmasin kasal bo‘lib qolsa, koyka kerakmi? Ularga ish o‘rni kerakmi? Buni kim qiladi? O‘qimasa, o‘z ustida ishlamasa, keyin u qayerga boradi? Ayol kishining o‘zi savodsiz bo‘lsa, u tarbiyalagan bola qayerga boradi? Ayol kishining ishlashiga ko‘pchilik qarshilik qiladi, mutlaqo noto‘g‘ri bu. Ertaga ayol kishi ishlasa, bolasini ham shunga qarab tarbiyalaydi, — deydi viloyat hokimi.

Murodjon Azimovning qo‘shimcha qilishicha, 2022-yilda Qashqadaryodagi tug‘ilishlar 96 ming nafar kishini tashkil qilgan.