Telegram messenjeridagi kanallarda O‘zbekistonda faoliyat yurituvchi banklarga qarashli mavjud bankomatlardan naqd pul yechishdagi komissiya puli 1 dan 1,5 foizga oshgani xabar berilgandi.
“Daryo” muxbiri mazkur xabarga aniqlik kiritish maqsadida AT “Xalq banki”, “Mikrokreditbank” ATB, “O‘zsanoatqurilishbank” ATB, “O‘zmilliybank” AJ, AT “Biznesni rivojlantirish banki” AT “Aloqabank” axborot xizmati mas’ullari bilan bog‘lanib, holatga aniqlik kiritdi.
Bank axborot xizmati rahbarlarining bildirishicha, tarmoqlarda tarqalgan xabar noto‘g‘ri. Ayni kunda yuqorida tilga olingan banklarga qarashli bankomatlarda naqd pul yechish bilan bog‘liq xizmatlar uchun 1 foiz ustama olinadi. Xalqaro kartalardan pul yechish ham doimgidek 1,5 foiz ustama bilan amalga oshiriladi.
“O‘zmilliybank” AJ axborot xizmati rahbari Zebo To‘xtayevaning “Daryo”ga qo‘shimcha qilishicha, bank rahbariyati ayni kundagi mavjud 1 foizlik komissiya pulini pasaytirib, yarim foizga tushirish harakatini boshlagan. Tez orada mazkur banklarga qarashli bankomatlardan naqd pul yechish bilan bog‘liq xarajatlar 0,5 foiz evaziga amalga oshiriladi.
Eslatib o‘tamiz, ayni kunda O‘zbekistonda faoliyat yurituvchi “Davrbank”, “Anorbank”larga qarashli bankomatlarda bank mijozlari uchun naqd pul yechish xizmati 0,5 foizni tashkil qiladi.
Izoh (0)