Chikago universiteti tadqiqotchilarining ma’lum qilishicha, Afg‘onistondagi o‘nlab arxeologik obidalar muntazam talon-toroj qilish maqsadida buldozer bilan yo‘q qilingan. Bu haqda BBC xabar berdi.
Ularning aytishicha, sun’iy yo‘ldoshdan olingan suratlar tahlili avvalgi hukumat davrida boshlangan talon-torojlar davom etayotganini ko‘rsatgan. Vayronalar orasida, bronza va temir davriga, miloddan avvalgi 1000-yillarga oid qadimiy manzilgohlar mavjud. Ular miloddan avvalgi VI asrda Ahamoniylar saltanati hukmronligidagi qadimiy Afg‘onistonning eng boy va aholi gavjum mintaqalaridan bo‘lgan.
Chikago universitetining Madaniy merosni saqlash markazi tadqiqotchilari sun’iy yo‘ldosh tasvirlari va boshqa vositalar yordamida Afg‘onistonda 29 mingdan ortiq arxeologik yodgorliklarni aniqlagan. Tadqiqotchilar Balx viloyatining kosmik tasvirlarida 2018-yildan beri dog‘lar mavjudligini aytgan. Dog‘lar paydo bo‘lishi va vaqt o‘tishi bilan yo‘q bo‘lishiga ko‘ra buldozerga tegishliligi taxmin qilingan.
Markaz direktori odamlar bu joyni muntazam ravishda talon-toroj qilishni osonlashtirish uchun “tozalangan”ini ta’kidlagan. Professor Shtaynning fikricha, bu obyektlar yer qazish uskunalarini sotib olish yoki ijaraga olish imkoniyatiga ega bo‘lgan boy aholi tomonidan talon-toroj qilinishi mumkin.
Tolibonning axborot va madaniyat vaziri o‘rinbosari vazifasini bajaruvchi Atiqulloh Aziziy talonchilik hamda obyektlarning vayron qilinayotgani haqidagi iddaolarni rad etib, obidalarni kuzatish uchun 800 kishilik kuch tayinlanganini aytgan.
Izoh (0)