Transport prokuraturasi turizm faoliyatini amalga oshirish bilan shug‘ullanuvchi bir nechta subyektlarining faoliyatini to‘xtatishni so‘rab Turizm qo‘mitasiga xat yo‘lladi. Xat nusxasi “Daryo”ga kelib tushdi.
Transport prokuraturasi O‘ta og‘ir jinoyatlarni tergov qilish bo‘limi tomonidan turizm faoliyatini amalga oshirish bilan shug‘ullanuvchi bir nechta subyektlarining faoliyatini to‘xtatib turish bo‘yicha Turizm qo‘mitasi raisi Umid Shodiyevga xat yo‘llagan.
Xatda aytilishicha, nomlari keltirilgan (rasmda) turizm faoliyatini amalga oshirish bilan shug‘ullanuvchi tadbirkorlik subyektlarining mansabdor shaxslariga nisbatan Jinoyat kodeksining tegishli moddalari bilan qo‘zg‘atilgan jinoyat ishi yuzasidan dastlabki tergov ishlari olib borilmoqda.
Jinoyat ishi hujjatlariga ko‘ra, Panorama Airways MCHJ va yuqorida qayd etilgan turizm faoliyatini amalga oshirish bilan shug‘ullanuvchi bir nechta tadbirkorlik subyektlari umra tadbirlari uchun 3 ming 931 nafar O‘zbekiston fuqarolarining juda ko‘p miqdordagi pullarini aldash va ishonchini suiiste’mol qilish yo‘li bilan qo‘lga kiritib, ularni Saudiya Arabistonidan O‘zbekistonga qaytarishni va’da qilgan bo‘lsa-da, O‘zbekistonga qaytarmagan.
Hozirda minglab O‘zbekiston fuqarolari chet elda O‘zbekistonga qaytish imkoniyatsiz qolib ketganligi bois jinoyat ishi bo‘yicha to‘plangan dastlabki ma’lumotlarga ko‘ra, Panorama Airways MCHJ bilan hamkorlik qilgan, ya’ni yuqorida sanab o‘tilgan turoperatorlarning ushbu sohada faoliyat olib borishga ruxsat beruvchi hujjatining amal qilishini qonunda belgilangan tartibda o‘z faoliyatingiz doirasida to‘xtatib turish masalasini ko‘rib chiqishingizni so‘rayman, — degan O‘ta og‘ir jinoyatlarni tergov qilish bo‘limi boshlig‘i, adliya maslahatchisi A.D.Ibrahimov.
Avvalroq Panorama Airways tomonidan parvozlarning kechikishi tufayli O‘zbekiston fuqarolari umra safaridan qayta olmayotgani haqida xabar berilgan edi. Bosh prokuratura holat yuzasidan jinoyat ishi qo‘zg‘atilgan.
Izoh (0)